Tri-nation series champion India
India chuan Hero Tri-Nation Series a an match hnuhnung berah hnehna chang zo lo mah se match hnih an khelhah tlawm hmel an hmuh loh avangin an champion - India hian Ningani zan khan St Kitts & Nevis chu an match hnuhnung berah 1-1 in an inhnehtawkpui a ni.
Mumbai khawpuia inkhelah hian India tan Jackichand Singh chuan minute 38-naah goal hmahruai a khung a, mahni mualah India an chak ngei dawn niin lang mah se St Kitts & Nevis tan substitute G'Vaune Amory chuan minute 72-naah an si phurh a sut a, goal dang a luh loh avangin an inhnehtawk ta a ni.
Tri-Nation Series
India-in 2019 AFC Asian Cup qualifier-ah September 5 khian Macau chu khualmualah an lenchilh dawn a, Asia khawmualpui ramte inelnaah India-in inlan ve ngei a tum avangin AIFF chuan inbuatsaih nan he inelna hi a buatsaih. Inelna hmachhawn turin Mauritius leh St Kitts & Nevis sawm an ni a, he inelna hi kalpui a ni ta a ni.
Match hmasa berah Mauritius leh India inhmachhawnin Blue Tigers (India sawina)-in hnehna an chang a, match hnihnaah Mauritius hi St Kitts & Nevis nen 1-1 in an inhnehtawk ve leh bawk. Match tawp berah India-in St Kitts inhnehtawkpuiin an champion ta a ni. He inelna hi FIFA hriatpuia neih a ni a, football khawvela thuneitu sang ber hian international friendly match angin a pawm.
Mizo dinhmun
2019 AFC Asian Cup qualifier khelh mekah India hi Group A-ah Myanmar, Krygyzstan leh Macau te nen an awm ho mek a, match hnih an khelh tawhah Myanmar leh Krygyzstan hneh ve ve tawhin an group-ah hma an hruai mek. Macau nena an inhmachhawn tur squad inenchhin nan Tri Series hi hman a ni a, squad-ah Mizo pathum Jeje Lalpekhlua, Jerry Lalrinzuala leh Lalruatthara te an awm.
Tri Nation Series-ah Jeje Lalpekhlua'n match a khel ve ve a, Hnahthial tlangval hi a inhliam thutte a nih loh chuan Macau-ah a zin ang. Jerry Lalrinzuala chu Mauritius an hmachhawn ṭumin hun tawp hnaih lamah tlan luhtir a ni a, match hnuhnung berah erawh a inlan lo. Lalruatthara'n match pahnihah bench-ah hun a hmang ve ve a, Jerry leh Ruatthara dinhmun tur huaisen taka sawi a harsa rih hle.