Europa League khel tur Everton, khel lo tur Ajax Hei le, pound mtd 45 man Sigurdsson chu
Everton-in pound maktaduai 45-a an lakluh Gylfi Sigurdsson goal ropui zarah Ronald Koeman-a hoten Europa League an khel dawn. Season liam ta finalist Ajax erawh Rosenborg lakah tlawm nawnin group stage an thleng pha lo.
Nizan khan Grimaldi Forum, Monaco-ah draw neih a ni a, club inṭhen sawm dan kan hre hman lo. Europa League group stage-ah hian team 48 an awm a, group 12-ah ṭhendarh tur a ni. Premier League-in team hnih an thawh a, Everton leh Arsenal te chu English club aiawh tur an ni.
A awlsam lo
Poljud, Split-ah mual neitu Hajduk Split-in goal an khung hmasa a, Josip Radosevic-a'n minute 43-naah yard 35-na aṭangin goal mawi tak a khung. Goodison Park-ah Everton 2-0 in chak mah se Croatia-ah goal an chhuah avangin an dinhmun a derthawng.
Second half ṭan aṭanga minute khatna lekah Gylfi Sigurdsson a inlar a, Swansea aṭanga Toffees zawmtu midfielder hian yard 50-na aṭangin a khung. Kum 27 mi Sigurdsson hi Swans-in pound maktaduai 50 man a phu tiha an sawi lai khan player manto uchuak zia sawi nan hman a ni a, amaherawhchu yard 50 aṭanga goal khung thei player hi manto satliah a ni lo tih a pho chhuak.
Sum seng hnem Everton-in pawisa an hmang ṭha tih a lang chhunzawm a, keeper manto Jordan Pickford-a'n minute 65-naah Ghanaian striker Ahmed Said-a penalty pet a dan sak. Toffees-in khualmualah Hajduk Split nen 1-1 a inhnehtawkin aggregate-a an chakna chu 3-1 a ni.
Everton manager Ronald Koeman chuan, "Gylfi goal kha ka hmu a, bench-a ṭhu zawng zawng pawh khan an hmu kher lo ang. Goal ropui tak a ni tih baka han sawi belh dan tur pawh ka hre lo," tiin an goal chu mimal thiamna hmanga khung a ni tih a sawi.
Ajax an mualpho
Ajax-in an mualah Rosenborg goal khatin an hneh lo a, group stage thleng turin Lerkendal Stadion-ah chak an mamawh.
Mualneitu Rosenborg-in bul ṭan ṭha a, Arsenal striker hlui Nicklas Bendtner-a'n minute 25-naah a khung. Amaherawhchu, Ajax-in Amin Younes leh Lasse Schone te hmangin an chhang let a, 2-1 a nih lai hian Dutch club hi away goal rule hmanga chak tur an ni.
Mahse, Samuel Adegbenro-a'n hun tawp hma minute 10 chhunga goal hnih khungin Rosenborg 3-2 in an chak. Ajax hian Champions League qualifier-ah Nice chu away goal rule hmangin an hneh lo a, playoff-a an chak loh avangin Europa League group stage pawh an thleng pha ta chuang lo. Dutch club hian 1990-91 season khan European competition-ah an inlan lo a, hemi hnuah tun season hi Europe-a inelnaa hneh an neih loh lehna hmasa ber a ni.
Europa League Playoff Results
AEK Athens 3-0 Club Brugge (agg: 3-0)
AEK Larnaca 0-0 Plzen (agg: 1-3)
Athletic Bilbao 1-0 Panathinaikos (agg: 4-2)
Austria Wien 0-1 Osijek (agg: 2-2)
Away goal rule hmangin Austria Wien an chak
Braga 3-2 FH Hafnarfjordur (agg: 5-3)
Crvena zvezda 2-1 Krasnodar (agg: 4-4)
Away goal rule hmangin Crvena Zvezda an chak
Dynamo Kiev 3-1 Marítimo (agg: 3-1)
Fenerbahce 1-2 Vardar (agg: 1-4)
Hajduk Split 1-1 Everton (agg: 1-3)
Maccabi Tel-Aviv 2-2 Altach (agg: 3-2)
Marseille 3-0 Domzale (agg: 4-1)
Midtylland 1-1 Apollon Limassol (agg: 3-4)
Olexandriya 1-2 BATE Borisov (agg: 2-3)
Ostersund 2-0 PAOK (agg: 3-3)
Away goal rule hmangin Ostersund an chak
Rosenborg 3-2 Ajax (agg: 4-2)
Salzburg 4-0 Viitorul (agg: 7-1)
Sheriff 0-0 Legia Warszawa (agg: 1-1)
Away goal rule hmangin Sheriff an chak
Shkendija 0-1 Milan (agg: 0-7)
Skenderbeu 0-0 Dinamo Zagreb (agg: 1-1)
Away goal rule hmangin Skenderbeu an chak
Suduva 0-0 Ludogorets (agg: 0-2)
Videoton 0-4 Partizan (agg: 0-4)
Zenit 2-0 Utrecht (aet, agg: 2-1)