Dortmund-ah ka hlim - Aubameyang

Bundesliga top scorer nilai Pierre-Emerick Aubameyang chuan club dangin ngaihven hle mah se Borussia Dortmund-ah a hlim tawk thu a sawi a, a chenna in ang maia nuam a tih thu a sawi chhuak.

Gabon international Aubameyang hian season hmasa khan league match 32 a khelh aṭangin goal 31 a khung a, ani aia khung hnem an awm lo. Tun nipui transfer laiin a club hlui AC Milan bakah Europe club lian ṭhenkhat chuan lakluh tumin an hel nasa hle.

Kum 28 mi Auba­meyang chuan, "A nihna takah chuan nipui chawlh kan hman hma khan club hruaitute hnenah boruak dang ka tem thut mai thei a ni tiin ka hrilh lawk. Mahse, eng thil mah a thleng ta lo, he hmunah hian ka hlim a, ka chenna in ang maia nuam a ni," tiin a sawi.

Dortmund stri­ker chuan sawi chhun­zawm­in,"Season duhawm kan hmang zo a, tunah a bul kan ṭan leh dawn chauh. Kum hmasa lama kan goal khung tawhsa kan ring thei lo a, point thum hmu tur chuan goal thar zel kan khung a ngai. Bayern Munich hi champion tura rinkai ni leh mah se tun season chu umphak kan tum ang, thapui kan thawh dawn a ni," tiin Bayern hnuaia awm a tum duh bik lo.

Bundesliga champion lai Bayern Munich chuan zanin dar 7:00 hian Werder Bremen an lenchilh dawn a, zan dar 10:00-ah Dortmund hian Hertha BSC an mikhual zui ve leh bawk ang.

Bundesliga Fixtures
Zanin Inkhel Tur
Werder Bremen 7:00 PM Bayern Munich
Eintracht Frankfurt 7:00 PM Wolfsburg
Bayer Leverkusen 7:00 PM Hoffenheim
Augsburg 7:00 PM Borussia M'gladbach
Stuttgart 7:00 PM Mainz 05
Borussia Dortmund 10:00 PM Hertha BSC
August 27, Pathianni
RB Leipzig 7:00 PM Freiburg
Hannover 96 9:30 PM Schalke 04