Chen Long leh Marin chak zel
Badminton World Championship khelh mekah Olympic champion Chen Long leh Carolina Marin ten hnehna an chang chho zel a, player langsar pahnih hian Ningani khan quarterfinal an in vaw kai.
Glasgow-a inkhelah seeded pangana Chen hian minute 41 chhungin India tlangval Ajay Jayaram chu 21-11 21-10 in a hneh. Hmeichhe singles lamah seeded pathumna Marin chuan Denmark star Mia Blichfeldt chu 21-7 21-11 in a hneh ve bawk. Spain nula Marin hian Japan star Nozomi Okuhara a hmachhawn leh ang.
China tlangval Chen hian quarterfinal-ah chuan seeded 10-na Tian Houwei a hmachhawn leh ang. Last 16 inkhel dangah Tian Houwei hian Brice Leverdez 21-14 21-8 in a lo neh ve bawk.
Hmeiche singles lamah beisei loh result kan hmu. Seeded pakhatna Akane Yamaguchi chu Chinese tleirawl Chen Yufei-i'n minute 52 chhungin 21-18, 21-19 in a hneh.
Kum 19 mi Chen Yufei chuan, "Badminton ka khelh hun chhunga ka result neih ṭhat ber pakhat a ni. Akane hneh hi ka thil tum lian tak pakhat a ni a, ka tihhlawhtlin theih tak avangin ka hlim hle a ni," tiin a sawi.