A chung berah Nadal leh Pliskova

Rafael Nadal-a'n tun hnaiah tun hma lama a awm tawhna ṭhin world number 1 dinhmun a luah a, hmeichhe lamah Karolina Pliskova pawhin ranking-ah a chung ber dinhmun a luah bawk. Mipa leh hmeichhe world number te hi August 28 aṭanga khelh ṭan tur US Open-ah seeded pakhatna ve ve an ni dawn.

Spain tlangval Nadal hian a vawi 10 nan French Open nomawi a chawi tawh a, kar leh aṭanga khelh tur US Open-ah hian kum 2010 leh 2013 khan a hlawhtlin tawh bawk avangin kuminah a champion leh a nih chuan hard court inelna liana nomawi a vawi thum chawina tur a ni ang.

Flushing Meadows-a inelna lian neih turah hian tun hnaia hliam vanga inlan mumal thei lo Andy Murray chu seeded pahnihna a ni a, season duhawm hmang mektu Roger Federer chu pathumnaah a awm thung. Swiss thiampuipa Federer hian nomawi a chawi thei a nih chuan a major title 20-na tur chiah a ni dawn a ni.

Inhliam vangin champion lai Stan Wawrinka leh Grand Slam vawi 12 champion tawh Novak Djokovic te an inlan thei dawn lo a, hei vang hian world number 6 Alexander Zverev chu seeded palina a nih theih phah.

Champion hlui Marin Cilic bakah Dominic Thiem, Grigor Dimitrov leh Jo-Wilfried Tsonga te chu player langsar an ni dawn a, tualchhung player zinga seeded 10 zinga lang phak awmchhun chu John Isner a ni.

Season hmasa hmeichhe final-a chak lo zawk Pliskova hian tun season-ah result a neih ṭhat zawk miau avangin seeded pakhatna a nih a ngai a, nomawi kawl mektu Angelique Kerber chu parukna a ni phak hram. German nula Kerer hian season hmasa khan Australian leh US Open nomawi a chawi a, kuminah erawh nomawi lian tham a la chawi miah lo.

Mipa (Top 10)
Seed Player Ram
1 Rafael Nadal ESP
2 Andy Murray GBR
3 Roger Federer SUI
4 Alexander Zverev GER
5 Marin Cilic CRO
6 Dominic Thiem AUT
7 Grigor Dimitrov BUL
8 Jo-Wilfried Tsonga FRA
9 David Goffin BEL
10 John Isner USA
Hmeichhei (Top 10)
Seed Player Ram
1 Karolina Pliskova CZE
2 Simona Halep ROM
3 Garbine Muguruza ESP
4 Elina Svitolina UKR
5 Caroline Wozniacki DEN
6 Angelique Kerber GBR
7 Johanna Konta GER
8 Svetlana Kuznetsova RUS
9 Venus Williams USA
10 Agnieszka Radwanska POL