Mayweather hmaah McGregor lu a 'hai'

"Round hnihnaah May­weather ka tuk zal ang," tih chu Conor McGregor ṭawngkam ni mah se a beisei ang ngawtin thil a awlsam lo - Las Vegas khawpuiah Floyd Mayweather 'kuttum' a dawnna lamah a lu a hai a, round 10-naah refe­ree-in inhnek titawpin Mayweather a chak.

Boxing khawvela hming dai tawh lo tur Mayweather a hmachhawn ngam avangin McGregor-a'n fak a hlawh a, a tawpa titi tui ber erawh kum 40 mi Mayweather-a thiamna, finna leh tha ṭhum thei lo chu a ni - vawi 50 inhnek a hmachhawnah a chak kim vek ta.

Hei le McGregor!
Round tir lamah Irish fighter-in a hnek chhuak hnem a, mah se defensive thiam hmingthang Mayweather buaina khawp erawh a tling zo lo. Vawi khat 'uppercut' nalh zetin rawn hnek fuh mah se 'ka hnek tlu dawn' tia a sawi erawh a thiamna phu loin a ṭawng pawr tih a lang nghal.

Mayweather-a'n a kut pahnih hmangin defensive a khel thiam a, Irish fighter-in ṭhiah ngaihna a hriat loh laiin McGregor-a inhup lai erawh Mayweather-a'n a ṭhiat fo a, boxing ring chhungah tawnhriat ngah zawk boxer a lang chhuak.

Plan a fuh
Fighter pahnih inhma­chhawn hmain boxer tam zawkin an ngaihdan an sawi a, Mayweather-a'n a chhaih chauh hnuah 'a hnek hrep ang' tih chu an ngaihdan a ni. McGregor-a pa tuaina hmuh turin a awm zauh zauh a, UFC lama an tih danin Mayweather a chum leh zauh ṭhin - keuh thluk a chak ṭhin tih a lang!

Round a rei tawlh tawlh a, Mayweather thiamna a lang chhuak tawlh tawlh. American boxer-in Irish fighter a chhaih chau a, round 10-na a thlen meuh chuan McGregor-a'n tih theih a nei lo - vawi thum vel chiang zetin Mayweather-a'n a hnek a, a tlu lo chu 'mak' tak a ni. Mahse, hnek let turin McGregor-a'n chakna a nei lo a, referee-in inhnek a titawp. Mayweather a chak.

McGregor faktu Mayweather
Floyd Mayweather-a'n hnehna a chan hnu lawkah boxing khawvel a mangṭha hlen tawh tur thu a sawi a, a hun tawp nana McGregor a thlang chu tifuh a intih thu a sawi tel bawk.

American boxer chuan, "Fighter hmachhawn hautak tak a ni. Ka rin aiin a thiam a, mah se a lakah chuan ka la chungnung hret a ni. Kan inhmachhawn hma khan 'rei tak' kan inhnek loh tur thu ka sawi a, vawiina kan fight khan boxing zahawmna a keng tel tlat a ni," tiin ama tan mai ni lo boxing tana fight hmachhawn a nih thu a sawi.

Mayweather chuan sawi chhunzawmin, "Hei bak hi fight ka hmachhawn tawh dawn lo. Ka hun tawp hman nan ka thlan tur dik tak ka thlang a, Conor McGregor, champion ropui tak i lo ni," tiin Irish fighter a fak a, vawi 49 inhneka hnehna chang vek, record a khum sak Rocky Marciano chu 'legend' tiin a fak bawk.

Boxing Hall of Fame-a a luh a inbeisei thu sawitu Mayweather chuan, "McGregor khan a tirah a ti thei viau a, mah se kha kha kan tum sa a ni. MMA-ah minute 25 chhung an inhnek ṭhin a, a hnuah chuan a chau tawh ṭhin. Chutiang chuan chhaih chauh phawta, a hnua hneh kha ka tum dan a ni. Mahse, ka pa nena kan beisei aiin a daih rei a, ka pa ngaihdanah phei chuan round rukna vela chau turah a ngai a ni," tiin Irish fighter chuan a rin aia a daih rei thu a sawi.

Referee a che hma - McGregor
UFC lightweight champion Conor McGregor-a'n boxing match a khelh hmasak berah hnehna a chang zo lo a, round 10-naa referee Robert Byrd-a'n inhnek a titawp chu a 'hma mah mah' tiin a sawisel.

Irish fighter chuan, "Ka chauh avangin tlemin ka buai deuh mai chauh a ni. Referee khan a pang­ngai rengin kal tir se, Mayweather khan min hnek thluk theih leh theih loh a chiang phawt tur a ni. Round hnih kan la hmabak a, insiamṭhatna hun ka la nei. Mahse, referee khan a nghak thleng zo lo a ni," tiin inhnek chu a tawp hma hreta a hriat thu a sawi.

Mahse, McGregor-a sawi angin referee khan inhnek titawp ta lo pawh nise round 10-na thlenga judge ten point an pek danah 89-81 89-82 87-83 in Mayweather a chak. McGregor chuan a khingpui fak chhun­zawmin, "Fighter che reng tak a ni hran lo a, tharum ngah tia sawi tur a ni lo bawk. Mahse, a tumah a chiangin a nghet em em a ni. Mahse, kan inhnek kha a tawp hma hretah erawh ka la ngai fan a, a tawp ka thleng ṭep a ni. Hnehna chan erawh a phu a, 50 fight nei tawh a ni a, a phu a ni," tiin a khingpui chu tawnhriat ngah zawk a nih thu a pha lo.

Ngaihnawm 
• Mayweather-a'n vawi 50 inhnek a hmachhawnah hnehna a chang vek a, Rocky Marciano nena record an inṭawm vawi 49 chu a khum ta.
• Mayweather-a'n vawi 50 inhnek a hmachhawnah vawi 27 a khingpui a knockout.
• September 2015-ah Mayweather-a'n Andre Berto hnehin inhnek a chawlhsan thu a puang a, mah se McGregor-a'n a cho hnuah pound maktaduai 230 bawr vel hlawh turin a lo kir leh.
• T-Mobile Arena, Las Vegas-a mi 20,000 lennaah mi 14,623 chiahin inhnek an en a, ticket to uchuak vanga ngaih a ni.
• McGregor-a'n MMA lama insawrbing tura pipe siam ṭhat hna a bansan khan Mayweather chuan profes­sional fight vawi 39 ngawt a lo hmachhawn tawh!

Inhnek Dang Results
Junior lightweight
Gervonta Davis def. (KO) Francisco Fonseca
Light heavyweight
Badou Jack def. (TKO) Nathan Cleverly
Cruiserweight
Andrew Tabiti def. (unanimous) Steve Cunningham
Welterweight
Yordenis Ugás def. (unanimous) Thomas Dulorme
Welterweight
Juan Heraldez def. (unanimous) Mexico Jose Miguel Borrego