MPL Season 6 khuh hawn a ni ta

Mizorama club football inelna sang ber Mizoram Premier League season 6 chu Zirtawpni zan khan Chanmari YMA Hall-ah Chirag Tanna, general manager, Reliance Sports chuan kickoff-na a nei.

Chirag Tanna chuan, "Kum 10 liam ta vel aṭang khan Indian football ka luhchilh a, Pune FC-ah head of operations dinhmun ka chelh. Ka hnathawh hmasa ber chu Mizo player ka lakluh kha a ni a, Jeje Lalpekhlua leh Lalrozama Fanai te ka lalut. Indian football ka hmelhriat ṭanna chu Mizoram football a ni," tiin Mizoten Indian football-ah sulhnu ṭha tak an hnutchhiah thu a sawi.

Indian Super League-a thluak bur bera an sawi Chirag chuan, "Miin min sawi ang hi engmah ka ni lo a, nangni ang thoa Indian football chhiahhlawh rinawm ve tak mai ka ni. Mizoram ka vawi khat rawn kalna a ni a, mah se he hming hi football vangin ka hre bel em em thung," a ti.

MPL6 hi August 31-ah match hmasa ber khelh tur niin Ramhlun North leh Aizawl FC an inhmachhawn ang a, match hnihna hi zan lamah Bethlehem Vengthlang leh Chanmari West FC ten an khel ang. MPL Board-in a rel angin Round 1-7 inkhelh ṭan hun hi tlai dar 3:00-a ni ang a, zan inkhel hi dar 7:30-ah ṭan tur a ni thung.

Mizoram Football Asso­ciation president Lal Thanzara chuan, "Nikumah MPL match hi Champhaiah kan lo khel tawh a, kuminah pawh round sarihna chu Lunglei khawpuiah khelh tura ruahmanna siam a ni," tiin MPL chu Mizoramah zar pharh zel a nih tur thu a sawi.

MPL6 kickoff-naah hian club inlan tur Aizawl FC, Bethlehem Vengthlang FC, Chanmari FC, Chhinga Veng FC, Chanmari West FC, Dinthar FC, Mizoram Police FC leh Ramhlun North FC model-ten an club jersey tur ṭheuh pholanna an nei a, MPL handbook tlangzarhna neih a ni bawk.

MFA chuan he hunah hian Mizoram Premier League bul ṭan tirh aṭanga tha thawhhlawk Lalzarzova (Sports Columnist, Vanglaini) leh PC Lala (MPL official photographer)-te chawi­mawina a hlan a, MPL club zinga I League cham­pion ni thei Aizawl FC chu lawmpuina an hlan bawk.