Sharapova leh Halep inhmachhawn nghal dawn
Zanin dar 8:30 aṭangin US Open khelh ṭan a ni dawn a, hmeichhe player langsar Maria Sharapova leh seeded pahnihna Simona Halep an inhmachhawn nghal dawn.
Thla 15 chhung hremna hmang zo tawh Sharapova hi United States Tennis Association chuan duhsak takin wildcard an pe a, tun hma lama vawi ruk a hneh tawh Halep hi khingpui huphurhawm tak tur niin a lang lo.
Mahse, Russian nula Sharapova hian tun hnaiah match a khel tam lo a, hliam vanga Wimbledon a khelh theih loh bakah wildcard pek a nih loh avangin French Open a khel lo bawk. Roland Garros-ah hian Halep hian final a lut phak thung. Romanain nula Halep hian US Open inbuatsaihna tournament Cincinnati Open-ah final a lut phak bawk.
Kumina Grand Slam hnuhnung ber tur US Open-ah hian mipa singles-ah Rafael Nadal chu seeded pakhatna a ni a, Spain tlangval hian a match hmasa ber atan world number 84 Dusan Lajovic a hmachhawn dawn. Seeded pathumna Roger Federer pawhin khawtual tlangval Frances Tiafoe a bitum ve thung dawn a ni.
Mipa champion lai Stan Wawrinka leh he hmuna nomawi vawi hnih chawi tawh Novak Djokovic te chu hliam vangin an inlan dawn lo. Swiss leh Serbian star te hi tun season chhung chu an hmel kan hmu thei tawh dawn lo.
US Open hi...
Kum 1881 aṭanga khelh ṭan US Open hi a tirah chuan Grass court-ah khelh a ni ṭhin a, kum 1975-1977 inkar khan Clay court-ah khelh niin United States Tennis Association (USTA) buatsaihin kum 1978 aṭanga tun thlengin Hard court-ah khelh chhunzawm zel rih a ni.
2016 US Open hi a ṭum 137-na niin zanin aṭanga September 10 thleng USTA Billie Jean King National Tennis Center-ah khelh tur a ni. Kuminah hian mipa leh hmeichhe singles bakah doubles leh mixed doubles hmanga inelna neih tur niin court hrang 15 zetah khelh tur a ni - mipui 23,771 lenna Arthur Ashe Stadium hi an khelhna tur hmunpui ber niin ruah a sur palh pawhin a chung khuh theih a ni.
Hawk-Eye
Kum 2006 aṭang khan US Open-ah hian khawl hmanga endikna (Hawk-Eye) hman a ni a, player ten set khat zelah vawi thum ennawn (challenge) an dil thei a, tiebreak khelh a nih chuan vawi khat an neih belh bawk. Player-in ennawn a dilna chu khawl hmanga a dik tih fianfiah a nih chuan a challenge neih kha a kiam phah lo a, a dik lo a nih erawh chuan a kiam zel thung.
Sum a tam
US Open hi Grand Slam pali zinga lawmman a sum fai tamna ber niin mipa leh hmeichhe singles champion hian $3,700,000 (Rs 23.63,74,500) zet an dawng dawn. Champion hian ATP leh WTA ranking-ah point 2000 an hmuh belh ṭhin a, final-a chak lo zawkin point 1200 an hmu thung ṭhin thung.