Dembele man zat tur £135.5m
Barcelona-in khawvel footballer manto pahnihna ni turin Borussia Dortmund aṭangin Ousmane Dembele an lalut dawn. Catalan club hian French midfielder lalut tura Bundesliga club sum an pek zat tur hi euro maktaduai 147 (£135.5m) thlenga pung chho thei tur a ni.
Barca hian kum 20 mi Dembele manah hian euro maktaduai 105 (£96.8m) an pe phawt ang a, French midfielder hian kum nga daih contract a ziak ang. Vawiin hian Dembele-a'n medical test a hmachhawn ang a, Catalan club hian an player thar release clause atan euro maktaduai 400 an dah thu an puang.
Catalan club hian pound maktaduai 75-in kum 2014 khan Liverpool aṭangin Luis Suarez an lalut a, Uruguayan forward hi Barca player manto ber a ni ṭhin a, Dembele man hian chiang takin a khum.
Amaherawhchu, Barca president Josep Maria Bartomeu chuan kum 2013-a Santos aṭanga Neymar lakluh nana an sum hman zatin euro maktaduai 100 (£92m) a pelh thu a lo sawi tawh a, official-a an puanzarna zat erawh £48.6m chauh a ni.
Engpawhchunise Barca-in Neymar an lakluhna man zat aiin Dembele an lakluhna man zat tur hi a tam zawk a, amaherawhchu khawvela footballer manto ber erawh Neymar a ni. Brazilian forward Neymar hi Paris St-Germain-in pound maktaduai 200-in Catalan club aṭang hian an lei chhuak.
Dembele hian Ligue 1 club Rennes tan 2015-16 season khan goal 12 khungin assist vawi nga a nei a, Ligue 1 young player of the year a thlan a ni. Nikum May thla khan French midfielder hian euro maktaduai 15 (£13.8m)-in Dortmund a zawm a, German club tan hian goal 10 khungin assists vawi 21 a nei a, theihna a nei sang tih a record hmangin a thai lang.