Manchester khaw club an chak
Manchester City-in hun pek belha Raheem Sterling-a goal hmangin AFC Bournemouth 2-1 in an hneh hram a, Inrinni zan Premier League inkhel dangah Manchester United tan Romelu Lukaku-a'n penalty hlah mah se substitute pahnih Marcus Rashford leh Marouane Fellaini te goal hmangin Leicester City 2-0 in an hneh.
August thla tawp rualin transfer hun a zo ang a, international break-in a chhunzawm nghal dawn. September 9
aṭangin Premier League inkhel en tur a awm leh chauh dawn a, hemi tlai dar 5:00 hian Pep Guardiola hoten anmahni ang bawka Champions League khel tur Liverpool an hmachhawn nghal ang.
Boruak a sang
Dean Court-ah referee Mike Dean-a thutluknain sawi zui a hlawh a, mualneitu Cherries ang thoin point thum hlawh chhuak Manchester City pawh an lawm chuang lo.
Bournemouth tan minute 13-na lekah Charlie Daniels-a'n goal hmahruai a khung a, minute riat hnuah Sergio Aguero aia thlan Brazilian forward Gabriel Jesus-a'n City siphurh sutna goal a khung.
Pep Guardiola hoten goal an khung hnuah inkhel an thunun hlak a, Jesus-a'n goal hnihna khung ṭha nei mah se Nathan Ake-a'n a titlu a, Chelsea defender hlui red card pek theihna turah yellow card chauh pek a ni.
Cherries-in goal venhim hna an thawk a, minute 90 chuang an ṭan tlang hnuah hun pek belh minute nga an ṭang tluan leh bawk. Bournemouth lamin hun tawp mai turah ngaiin counter attack hmangin an vaw let a, Joshua King-a'n City defender Benjamin Mendy nek hneh mah se Brazilian goalkeeper Ederson-a'n a hmingṭhatna tur a hliah khuh sak.
Hemi hnu hian City-in nawr letin Raheem Sterling-a'n mawi zetin chakna goal a khung a, English forward goal khung hi mipui lamin an lawmpui a, an rik luih luih hnuah referee Mike Dean-a'n Sterling hi yellow card vawi hnihna pein a hnawt chhuak.
Sawi zui hlawh
Bournemouth tana goal khungtu Charlie Daniel chuan, "Minute nga an pek belh chunga minute sarihnaa goal an khung kha ka hriatthiam loh avangin referee ka zawtfiah a, a chhan ka hre duh a ni. An goal khungna tura Lys Mousset-a tackle kha a fuh tehreng nen foul min pe bawk si," tiin a lungawi loh thu a sawi.
Second half minute 45 atana hun pek belh hi minute nga a ni a, minute 100 an khelh avangin injury time minute nga atana an pek belh leh chu minute nga tho a ni.
City an chak nachungin Sterling-a hnawhchhuah a nih avangin an lawm lo. Pep Guardiola chuan, "A chhan ka hrethiam thei lo. An hnawhchhuah chhan sawi tur chuan engtik lai pawhin min rawn be thei ang," tiin a lungawi loh thu a sawi.
Spanish manager lungawi lohna ṭawmpuitu an tam. Premier League history-a player ropui ber zinga mi Alan Shearer chuan, "Mike Dean hian chakna goal khung nawm zia a la tem lo a ni. Chhia leh ṭha hriatna pawhin thliar hran ve tur a ni," tiin a sawi.
Sterling hi West Ham player Frederic Piquionne-a'n January 2011-a Everton lama chakna goal a khung hnua Premier League-a goal khung lawm nasat vanga hnawhchhuah tawk leh hmasa ber a ni.
United an vul
Manchester United-in Old Trafford-ah attacking football an khel a, mikhual Leicester City lamin goal venhim hna an thawk. Jose Mourinho naute goal nawr mah se goal an vannei tawk lo a, Romelu Lukaku-a'n Leicester City wing back Danny Simpson handball vanga an penalty an hmuh a pet chu Foxes keeper Kasper Schmeichel-a'n a dan sak.
United tan Belgian striker penalty hlah hi vanduai hmahruai niin lang a, amaherawhchu substitute pathumin danglamna an thlen. Rashford-a'n a luh aṭanga minute thumna lekah Henrikh Mkhitaryan corner pet chu a pet goal a, minute 82-naah substitute Jesse Lingard ball petin amah ang bawka bench aṭanga lut Fellaini khup perin Belgian midfielder-in goal hnihna a khung.
Manchester United manager Jose Mourinho chuan, "Season liam ta pawhin kan mualah Leicester City kan hneh a, match hmasa pathumah kan chak vek a, danglamna a awm lo. Tun season-a danglamna erawh kan result ni loin kan khelh dan hmang a ni a, Leicester City nen khan inhnehtawk pawh ni ila ka player tumah ka dem lo ang," tiin a sawi.
Season hnuhnung pahnihah United hi zan 14 chhung chiah hmahruaitu an ni a, tun season-ah an record duhawm lo tak hi nuai reh thuai dawn niin a lang.
Inkhel dang
Bournemouth ang thoin Crystal Palace leh West Ham United ten match thumah chak ni hmel an la hmu lo. Newcastle United erawhin match thumnaah goal thum khungin Hammers 3-0 in an sawp a, Dutch manager Frank de Boer kaihhruai Crystal Palace chuan an mualah Swansea 0-2 in an hneh lo.
Kaithar Huddersfield Town-in an mualah Southampton an chelh a, Watford leh Brighton & Hove inkhelah goal a lut lo bawk.]
Inrinni Zan Inkhel Results
AFC Bournemouth 1 - 2 Manchester City
BOU : Charlie Daniels 13'
MANC: Gabriel Jesus 21' ; Raheem Sterling 90+7'
Crystal Palace 0 - 2 Swansea City
SWA : Tammy Abraham 44'; Jordan Ayew 48'
Huddersfield Town 0 - 0 Southampton
Newcastle United 3 - 0 West Ham United
NEW : Joselu 36'; C. Clark 72'; A. Mitrovic 86
Watford 0 - 0 Brighton & Hove
Manchester United 2 - 0 Leicester City
MANU : Marcus Rashford 70'; Marouane Fellaini 82'
Team Dinhmun
# Team Pld W D L GF GA GD Pts
1 Manchester United 3 3 0 0 10 0 10 9
2 Huddersfield Town 3 2 1 0 4 0 4 7
3 Manchester City 3 2 1 0 5 2 3 7
4 West Brom 2 2 0 0 2 0 2 6
5 Watford 3 1 2 0 5 3 2 5
6 Southampton 3 1 2 0 3 2 1 5
7 Liverpool 2 1 1 0 4 3 1 4
8 Everton 2 1 1 0 2 1 1 4
9 Swansea City 3 1 1 1 2 4 -2 4
10 Tottenham Hotspur 2 1 0 1 3 2 1 3
11 Arsenal 2 1 0 1 4 4 0 3
12 Chelsea 2 1 0 1 4 4 0 3
13 Burnley 2 1 0 1 3 3 0 3
14 Newcastle United 3 1 0 2 3 3 0 3
15 Stoke City 2 1 0 1 1 1 0 3
16 Leicester City 3 1 0 2 5 6 -1 3
17 Brighton & Hove 3 0 1 2 0 4 -4 1
18 AFC Bournemouth 3 0 0 3 1 5 -4 0
19 Crystal Palace 3 0 0 3 0 6 -6 0
20 West Ham United 3 0 0 3 2 10 -8 0