Juve tan Dybala hattrick

Paulo Dybala hat­trick hmangin Serie A champion Juventus chuan si hnih an phurh zet hnuah Genoa chu 4-2 in an lehthal. Inrinni zan inkhel dangah Mauro Icardi goal hnih hmangin Inter Milan chuan AS Roma 2-1 in an hneh ve bawk.

Juve midfielder Mira­lem Pjanic-a'n ṭan aṭanga minute khatna lekah an mahni lamah a ti lut palh a, Andrey Galabinov chuan penalty aṭangin an goal hnihna a khung bawk, minute sarih chhung lekin Juve lamin si hnih an phur.

Massimiliano Allegri naute hi khual mualah an mualpho ngei dawn niin a lang hman. Mahse, Argentine forward Dybala-a'n goal hmaa a hriam tawk zia lantir nan goal thumin a chhang let a, midfielder Juan Cuadrado-a'n goal khat thawh ve bawk.

Kum 23 mi Dybala hian Serie A bikah goal 50 a khung tling ta chiah a, Juventus tan bik inelna hrang hrangah match 97 a khelh aṭangin goal 48 a khung tawh, a hun hmasa lamah Palermo tan season thum chhungin goal 21 a khung tawh bawk a ni.

Inkhel dangah Roma chu an khelmualah an tlawm. Champion tum ngam pahnih inkhela danglamna chu Mauro Icardi a ni. Roma hian season hmasa Serie A top scorer Edin Dzeko hmangin goal khung hmasa mah se Inter lamin Icardi goal hnih leh Matias Vecino goal khat hmangin an chhang let a, manager Luciano Spalletti-a'n a club hlui a hmachhawnna hmasa berah hnehna a chang chiang hle.