Vawi lia vawi li chak PSG

Paris St-Germain tan French Ligue 1 season tharah hna harsa a la awm lo. Zirtawpni zan khan an league match palina khelin a zawna match thum chak tawh Saint-Etienne chu 3-0 in an sawp.

Parc des Princes-a inkhelah season hmasa league top scorer Edinson Cavani-a'n goal hnih a khung a, player manto ber Neymar-a freekick aṭanga ball lo kal chu Thiago Motta-a'n a khung ve bawk.

Uruguay international Cavani hian tun season league match li a khelh aṭangin goal nga a khung leh der tawh a, season hmasa lama a khung zat (35 goals) khung leh turin bul a ṭan fuh hle.

Pound maktaduai 200 man Neymar-a'n a club thar tan inkhel pawimawhah a vawi khat nan goal a khung lo. Brazil captain hian a match hmasa pathumah goal thum a khung bakah a ṭhiante khung tur vawi thum bawk a siamsak tawh a ni.

PSG manager Unai Emery chuan, "League match hmasa pathuma hnehna chang vek thei lakah goal chhuah loin hnehna kan chang thei a, international break a awm hma ngeia dinhmun kan sawhnghet hman hi a lawmawm hle a ni," tiin a sawi.