Spain tan kum 35 mi David Villa

Spain tana goal khung hnem ber David Villa chu kum 35 mi a nih hnuah ram tana khel tura koh leh a ni. Barcelona striker hlui hian World Cup qualifier-ah Italy leh Liechtenstein a hmachhawn ang.

Chelsea manager Antonio Conte-a'n a chhawr duh loh Diego Costa erawh ram tan hian koh a ni ve lo a, kar hmasa khan Spain coach Julen Lopetegui-a'n Chelsea leh Tottenham te inkhel en mah se goal hnih khungtu Blues defender Marcos Alonso tan hmun a awm lo bawk.

Costa awm loh laia koh Barcelona striker hlui Villa hian tun hmain ram tan goal 59 a khung tawh a, Euro 2008 leh 2010 World Cup champion an nih theih nana player pawimawh a ni phak. Mahse, kum 2014 World Cup group stage an paltlang zawh loh hnuah ram tan koh a ni leh tawh lo.

Atletico Madrid leh Valencia tan pawha khel tawh Villa hian tun season-ah MLS club New York City FC tan match 23 inkhel bul a ṭan aṭangin goal 19 a khung tawh a, coach Julen Lopetegui kaihhruaina hnuaiah Chelsea striker Alvaro Morata leh Liverpool forward hlui Iago Aspas te nen khelhna hmun an inchuh ang.