Chennaiyin-ah Jaime Gavilan a lut
Mizo tlangval Jeje Lalpekhlua leh Jerry Lalrinzuala te khelhna Chennaiyin FC chuan season thar atan Spanish attacking midfielder Jaime Gavilan Martinez an lalut a, kum 32 mi midfielder hi South Korean club Suwon FC-a a contract a zawh avangin free transfer-in an lalut.
Valencia youth academy aṭanga inzir chhuak Jaime hian Spain tan age level hrang hrangah a khel tawh a, Spain U16 leh Spain U19-in Euro 2001 leh 2004 nomawi an chawi ṭum khan a tel ve ve. Kum 2003 FIFA U20 World Cup-ah pawh Spain tan a inlan a, final-ah Brazil an hneh lo thung.
Jaime hian Valencia tan season li a khel a, a hun tam zawk erawh Getafe leh Tenerife-ah a hmang thung. Valencia tan hian Champions League leh Europa League hial pawh a khel. Kum 2015 khan Indian Super League-ah a lo khel tawh a, Atletico de Kolkata tan a inlan a ni.