Tennis lal thar Carlos Alcaraz
“Grand Slam nomawi leh world number 1 nih hi ka phu tawh e," tih chu Carlos Alcaraz-a'n a thil tih hmangin a lantir. Spanish rawlthar hian Casper Ruud hnehin US Open nomawi a chawi a, sulhnu ropui dang pawh a hnutchhiah chhunzawm ngei ang.
Pathianni zanlai khan final khelh niin, darkar thum leh minute 20 chhungin Alcaraz hi 6-4, 2-6, 7-6(1), 6-3 in a chak. Kum 19 leh thla li mi chauh a la ni. Nimin tlaia world ranking chhuak tharah Daniil Medvedev lehpelin world number 1 a ni nghal bawk.
Player ropui Roger Federer, Nadal leh Novak Djokovic te hun a liam mek a, tennis ngainatuten 'Player Ropui' ṭan tur an dap mek, an duh leh mamawh chhanna chu Alcaraz hi a ni thei ang, a kum la naupang mah se infiamna khawvelah a puitling tawh.
Final hmuhnawm
Arthur Ashe Stadium-ah player pahnihin US Open nomawi bakah world number 1 nihna an inchuh, a boruak chu sang tak a ni. Set khatnaah Alacaraz hian a khingpui service chhuhsakin a dingchang hmasa zawkah a ṭang.
Set hnihnaah erawh game hnih chiah a la ve hman, set thumna khelh niin Spanish rawlthar hi 6-5 in a hniam zawk - a khingpuiin set point vawi hnih a hmuh tawh chu a pawtthla a, tie break khelh zui niin set latu zawk a ni chhunzawm.
Kum 19 mi Alcaraz hian set hnuhnungh berah chuan harsatna lian tham a tawk lo, unforced errors vawi 41 lai nei mah se a ball vuak na tak hmangin winners ṭum 55 a vaw chhuak thei a, a chakna hnar pawimawh a ni.
A bul ṭanna chauh
Nadal chakna thuruk chu tharum a ngah, tiin an sawi ṭhin - Nadal hian kum 35 a tlin thlengin tharum a ngah reng, khawvela Grand Slam nomawi nei hnem ber pawh a ni thei hial, a hnampui Alcaraz hian Rafa hnung a rawn zui a nih pawhin a mak lo ang.
6ft a sang Alcaraz hi player ṭhenkhat angin a sang tawk lo, service kawngah duhthu a sam chiah lo deuh a ni mai thei, tharum erawh a nei ṭha takzet, a inkhel en ṭhin chuan a class sanzia leh a rilru huaisenzia an hmu ṭhin bawk.
US Open nomawi chawi tur hian match sarihah hnehna a chang a, a inkhelh hun chhung belh khawm chu darkar 23 leh minute 40 a ni hial. Point hnuhnung ber a hmuh hnua chak lawm nan a mu kha chu a mak hran lo.
Nadal zuitu
Mipa tennis player zingah rawlthar nih laia Grand Slam nomawi chawi hi thil namai a ni lo. Kum 1980 chhoah khan Mats Wilander, Michael Chang leh Boris Becker te chu kum 17 mi niin inelna lianah an champion thei.
Mahse, 1990 a rawn inher chhuak a, Grand Slam hi best of five hmanga chak zawk zawn a ni. Tharum a ngai hnem a, hei vang hian Nadal leh Alcaraz te chauh hi kum 20 tlin hmaa major title la leh thei an ni hial.
Alcaraz chuan, "Naupang ka nih lai khan duhthu ka sam ṭhin, chu chu world number 1 nih leh Grand Slam champion nih a ni. Tun dinhmun thleng thei tur hian ka theihtawp tak meuh meuhin ka thawkrim," tiin a sawi.