Tlai dar 3-ah MPL kai thar leh champion lai

Zote Honda MPL9-ah champion lai Aizawl FC-in a zawna vawi thum champion turin squad an nei ṭha a, I League club hian vawiin tlai dar 3:00 hian FC Bethlehem an hmachhawn ang.

Coach Lalrozama Fanai-in MPL-a team a kaihhruai hmasak berah a club hlui Aizawl FC a enkawl a, Chawnpui FC lakah hnehna a chanpui. Match hmasa berah hian AFC hian squad an neih ṭhatzia an pholang.

Midfield-ah Indian Arrows captain hlui Lalchhanhima Sailo, India U15 tana khel tawh Joseph Vanlalhruaia leh club academy chhuak K. Lalhmangaihkima ten bul an ṭan.

Bench aṭangin Inter Village 2022 best player Lalramsanga leh Santosh Trophy-a Mizoram midfielder pawimawh K. Lalrinfela te an la lut thei a, chhawr lohin Khelo India U21 leh Dr T Aoa U21-a Mizoram champion puitu KC Larchhuakmawia a la awm cheu.

Aizawl FC-in Chawnpui FC an hneh theihna chhan pawh hi squad chhah vang a ni a, coach Rozama'n a hun taka substitution a siam vangah a ngaih theih bawk. Bethlehem lakah pawh I League club hi chak tura rin an ni a, mah se a awlsam dawn lo. Coach Victor Lalbiakmawia hnuaiah FCB-in hma an sawn a, an player neih tharte an ṭangkai bawk.

Bethlehem hian an match hmasa berah FC Venghnuai 3-3 in an chelh a, hemi ṭum hian player thar Sena Ralte chu man of the match a ni.

FCB vanneih ṭum ni se chak thei tur an ni a, 3-3 a nih hnuah chance ṭha ṭum hnih an hlah. Chutihrualin inkhel turte hi kai thar leh champion lai an ni miau a, Bethlehem tan chuan point hlawh chhuak turin tihsual neih a thiang lo ang - dar 3:00-ah inkhel hmuhnawm beisei rawh.