Bayern Munich tana Robert Lewandowski hnathawh ropuizia inhrilh nawn a ngai lo. Mahse, heti chung hian Polish striker hian boruak ṭha lo tak chungin German champion a chhuahsan a, Barcelona a zawm. 
Kum 34 mi striker hian a la chen ngai lohna ramah pawh insiamrem turin hun a mamawh lo a, Catalan club tan match ruk a khelhah goal kua a khung leh der tawh - zaninah a club hlui Bayern a hmachhawn dawn a, dar 12:30-ah Allianz Arena-ah a kir leh dawn. 
Lewy vang ringawt pawhin Champions League group stage-a team pahnih intawng tur hi en châkawm a tling a, European football-a club pahnih inhalna chu thawnthu ngaihnawmna belhchhahtu a ni. 
Thawnthu hlui European football-a club ropui pahnih intawng tur an ni a, boruak a lian lo thei lo - Champions League-ah vawi 13 an intawng tawh a, Barca hi vawi hnih chiah la chakin, Bayern-in vawi kua hnehna an chang a, vawi hnih an inhnehtawk. 

Season hmasa pawh khan team pahnih hi group khatah an lo awm tawh a, an intawn vawi hnihah 3-0 ve vein Bayern an chak a, goal thum chu Lewy khung a ni - 2019-20 season khan Champions League quarterfinal-ah an intawng a, Covid-19 vanga single leg-a khelh a nih lai a ni. 
He inkhelah hian mualpho theihtawpin Barca an mualpho a, Bayern hian 8-2 in an sawp - Lewandowski chuan goal khat a khung ve bawk; tunah erawh Barca player a ni tawh a, Bayern hneh a tum tawh dawn. 
Hmelhriat Lewy Bayern-in Lewy an hre sa a, dan theih dan pawh hriaah an inngai. German club midfielder Marcel Sabitzer chuan, "Defender ṭha tak tak kan nei a, thawhhona ṭha nen kan dang ang," a ti a, Leon Goretzka chuan, "Training aṭangin goal hmaa Lewy hlauhawmzia chu kan hria a, kan la tawn loh striker a ni lo," tiin Lewy an hriatchian thu a sawi. 

German keeper Manuel Neuer chuan, "A bik takin training-na aṭangin Lewy hi kan hre bel hle. A theihna kan hria a, ani pawhin hmachhawn kan châkawm dawn lo tih a hria a ni," a ti a, Goretzka chuan, "Zaninah chuan goal hmaah a insum a ṭul ang," a ti bawk.
Bayern sporting director Hasan Salihamidzic chuan, "Barca hi kan hlau em, ka hre lo a, mahse, kan ṭan lehzual a ngai ang tih chu ka hria. Barca hian player ṭha tak tak an nei a, football hmuhnawm tak an khel a, a hun neih apiang chhawr ṭhin Lewy an nei bawk," a ti a, an khingpui tur team a dah sang hle. 
Zah phu Lewy Lewandowski-a'n boruak ṭha lo takin Bayern a chhuahsan a, Allianz Arena-ah eng angin nge fan-ten an lo lawm dawn hriat a châkawm hle - manager Julian Nagelsmann chuan fan-te chuan an player hlui chu an lo lawm a beisei thu a sawi. 

Nagelsmann chuan, "Lewy nen kan intawng leh dawn a, mahse, khingpui anga lo lawm chiam chu ka châk lo - a hlauhawmzia ka hre tlat a ni. A chhuah dan chu eng pawh ni se, fan-ten hlim taka an lo lawm ka beisei tlat a ni," a ti. 
Bayern hian Lewy ringawtah rilru an pe ang tih erawh a hlauhawm - Barca hian league match nga an khelh tawhah tlawm an la nei lo a, goal 15 zet khungin an lamah goal khat chiah a la lut a, tlarhnung leh hmaah an ṭha hle. 
KhaikhinnaBayern hian an league match hmasa pathumah goal 15 zet an khung a, an lamah goal khat chiah a lut - mahse, he team hian an league match hnuhnung pathumah an khingpui an inhnehtawkpui vek a, goal li chiah an khung!

German club tan Barca laka insiamṭhat a harsa dawn tih a chiang a, chutihrual chuan he team hian 2-0 a Inter Milan an hneh tawh avangin inrintawkna an nei ang - Sadio Mane hoin Leroy Sané, Thomas Müller leh Serge Gnabry te ho an chet ṭhat a ṭul dawn a, tlarhnungah Matthijs de Ligt leh Lucas Hernandez te an ṭan a ṭul dawn. 
Barca tan Lewy a lansarh viau rualin Raphinha, Ousmane Dembélé, Pedri leh Ansu Fati te an awm tih hriat a ṭha a, tlarhnungah Jules Koundé leh Eric García te an awm bawk. 
Inter inlan hun Tun season-a beisei phak lo Inter Milan-in zanin dar 10:15-ah Czech champion Viktoria Plzen an lenchilh dawn a, Bayern leh Barca awmna group aṭanga last 16 an beisei dawn a nih chuan tlawm a thiang lo. 

Inter hian league match ruk an khelh tawhah vawi li hnehna chang thei mah se, vawi hnih an tlawm tawh a, table-ah pangana an ni mek - Bayern lakah 2-0 a an tlawm bawk avangin insiamṭhat an mamawh. 
Serie A club tan Romelu Lukaku a la dam loh avangin Lautaro Martinez chungah beiseina a sang leh dawn a, an league match hnuhnung bera bench aṭanga lut Robin Gosens, Henrikh Mkhitaryan leh Alessandro Bastoni pawh bul ṭan tura beisei an ni.