Electric Veng hmaah Police fiahna

Mizoram Police-in kum 2012 hnua a vawi khat nan nomawi an chawi a, I Day Football-ah an champion. Police hian Mizoram Premier League-ah erawh nomawi an la chawi lo a, Lalbiaksanga Colney hoin champion ngei an tum.

Zote Honda MPL9-ah pawh Police hi champion rinkai ni mah se match hmasa bera an khelh dan aṭanga thlir chuan champion hi a awlsam dawn lo. Vawiin chhun dar 12:00 hian Police leh Electric Veng an inkhel dawn a, BS-a hote tan fiahna ṭha tak a ni thei ang.

Police hian match hmasa berah Chhinga Veng an hmachhawn a, bench-ah Malsawmfela, Lalfakzuala leh Lalbiak-hlua (Hlutea) te an dah bawk nen an goal bawh a na lo. Chhingcows hian inkhel an thunun zawk a, I Day Football zawhah hma an sawn hret a tih theih laiin Police erawh an tlahniam zawk niin a lang.

Electric Veng hi MPL8 finalist ni mah se tun season-ah champion rinkai an ni phak lo a, chutihrualin an match hmasa ber thlir chuan Jacob Lalrawngbawla kaihhruai team hi khelh an awlsam dawn lo.

Electric Veng hian midfield-ah Vanlalremkima (Tetea) leh H. Zawnhmingthanga te an dah a, Police-in R. Malsawmtluanga leh H. Lalbiakthanga te an dah thung. Midfield battle a hmuhnawm dawn.