Ajax mikhual tur - harhtharna chan beisei Liverpool

Tun season-ah Liverpool fan-te an nui khat takzet - inelna hrang hranga match sarih an khelh tawhah vawi hnih chiah an la chak a, an chak vawi khatah hian injury time-ah goal an khung!

Jurgen Klopp-a team hmuhnawm tak, eng club mahin hmachhawn an châk loh kha, kan mit hmuh lai ngeiin an awngrawp tial tial a, Liverpool tlukchhiat inṭanna kan hmu nge, an tho leh dawn? tih zawhna pawh hi huai taka chhan ngam harsa tak a ni.

Premier League-a beisei phak lo team hian Champions League hmanga an mangchhia mangṭha an tum a, mahse, an match hmasa berah Napoli chu 4-1 zetin an ngam lo - an hmai bal phih fai an tum a, an tiberh zual a ni ber!

Zanin dar 12:30-ah he team hian an mualphona hliahkhuh turin hun duhawm an nei leh ta a, Champions League match-ah Ajax an mikhual dawn - mahse, a awlsam dawn lo.

Thawh a ngai
Napoli laka an mualpho zawhah Jurgen Klopp-a'n an tih ṭhat tawk loh thu a sawi a, "Kan indinthar leh a ngai niin a lang a, kil tinah insiamṭhat kan ngai vek a ni," a ti - hei hian Liverpool dinhmun chiang takin a hrilhfiah.

Khawvela fullback inkawprem ber ang hiala tam takin an ngaih Trent Alexander-Arnold leh Andrew Robertson ten season an hmang chhe takzet a, Virgil van Dijk lah a thiam a theihnghilh ta emaw tih mai tur a ni a, Joel Matip leh Ibrahima Konate inhliam avanga Joe Gomez nena an inkawp ngai chuan a pui lo.

Midfield en ila, hliam an tam avangin kum 36 mi ni tawh James Milner kan hmuh fo a ṭul a, kum 19 mi Harvey Elliott hian theihna sang tak nei mah se tlarhnung puih kawngah a ṭha tawk lo a, tlarhmaa Mohamed Salah lah a hlawh tam a zo lo em ni chu aw, tih mai tur a ni!

Klopp hian Napoli an tum zawhah hian, "Ni thum hnuah Wolves kan tum leh dawn a, kan inkhel an en chuan an nuih a za ve ngawt ang," a ti hial - coach tan chuan hetianga mahni team chungchang sawi a ngai ta hi a na ang, tih a chiang.

A thar dawn em?
Premier League-a Wolverhampton Wanderers hmachhawn tura Liverpool an inbuatsaih laiin Queen Elizabeth II a thi a, UK lal ni rei ber thihna avang hian kartawp league inkhel chu sawn a ni a, Liverpool-in insiamremna hun an neih rei phah sawt.

Reds chet chhiat chhanah Klopp-a hman thiam sa 4-3-3 chu an khingpuiten an hre bel tawh lutuk, tia sawi a ni. German coach hian zaninah 4-2-3-1 a rawn hmang dawn nia sawi a awm a, Thiago Alcantara pawh bul ṭan thei tawh tura ngaih a ni.

Napoli lakah Joel Matip luh hnuin Reds tlarhnung a nghet sawt a, Ajax lakah VVD nen an inkawp a rinawm. Klopp hian Arnold a la ring reng ang em, tih chu inzawh theih a ni a, hetihlai hian Robertson chu khup hliam vangin a inlan thei dawn lo bawk - Konstantinos Tsimikas tan chance a awm dawn tihna a ni a, Fabinho chu right back-ah dah theih a ni bawk ang.

Midfield-ah Thiago leh player thar Arthur Melo an inkawp thei ang. 4-2-3-1 a nih chuan tlarhmaah Diogo Jota a mal tlat thei ang a, Darwin Nunez, Mohamed Salah, Roberto Firmino leh Luis Diaz aṭangin thlawptu a nei thei bawk ang - Salah ber hi bench-ah awm ta se, thil mak a ni kherin a rinawm loh.

Ajax an ṭha
Liverpool-in insiamṭhat an tum viau a, mahse, Ajax an hmachhawn dawn avangin hna a awlsam dawn lo. Dutch club hian league match ruk an khelh tawhah hnehna an la chang vek a, goal 21 khungin an lamah goal thum chiah a la lut!

Champions League-a an match hmasa berah Ajax hian 4-0 in Rangers an sawp bawk a, goal khung an harsat lo hle - tlarhnung talbuai tak Liverpool hian an chelh thei ang em, tih chu zawhna, a chhanna pek ngam harsa tak a ni.

Dutch club tan Tottenham Hotspur aṭanga an lak Steven Bergwijn-a'n a thiam a la theihnghilh lo tih a pholang ṭhin a, tun season-ah goal riat zet a khung tawh - ven bik tur a ni.

Match riat aṭanga goal nga khung tawh Mohammed Kudus pawh Liverpool tan ngaihthah a thiang lo a, tun season-a goal thum chiah la chhuah tlarhnung pawh hi tawn tlang a huphurhawm khawp ang.