Sanga hoten point thum an hmu ta

Zote Honda MPL9-ah coach Lalsangzuala Hmar kaihhruai Chawnpui FC-in nimin khan FC Venghnuai 1-0 in an hneh a, point thum hlu tak an hlawh chhuak.

RG Stadium, Mualpuia inkhelah hian team pahnih an inkhel tawk a, inhnehtawk mai tura a lan hnuah Lalliansanga'n (Notea) chakna goal a khung.

Chawnpui leh Veng-hnuai inkhelah ruahsur tawh lo mah se khelmual a la nal avangin khelh a awlsam lo. Team pahnih an thawkrim a, an tlan tam a, goal chance erawh hmuh tur a awm meuh lo.

Venghnuaiin freekick hman ṭangkai an tum a, captain Vanlalthanga ball pet thiamna chu an hmachhuan ber a ni. Chawnpui pawhin Laltlanzova (Zozoa) hmangin chance an nei ve bawk.

A tawpah Chawnpui an vannei a, minute 75-naah substitute Lamzawl tlangval Danny Zorammawia chuan dinglam aṭangin ṭha zetin a pet a, keeper R. Malsawmkima'n dang mah se a per chu Notea'n goal-ah a chantir.

Hun tawp lamah Venghnuaiin na takin an nawr a, goal erawh hmuh tur a awm tawh lo. Referee-in hun tawp hamrik a ham a, Chawnpui player-ten an thawm hmangin an lawm tih an lantir.

Chawnpui coach Lalsangzuala Hmar chuan, "MPL chu a harsa a ni. Point thum hlawh chhuak turin thawhrimna piah lamah vanneih a ngai. Point tam zawk hlawh chhuak turin kan ṭan lehzual a ngai a ni," tiin Vanglaini a hrilh.

Venghnuai coach Rindika Hmar chuan, "Kan vanduai a kaltluang a ni. Kan player pawimawh RF-a, Ruatfela leh Apuia te inhliam vangin an tel thei lo a, kan tuar hle. Chutihrualin kan kim loh ngaihtuah chuan kan khel ṭha, match hnihna chauh a la nia, kan insiamṭha thei ang," tiin a sawi.

Round 2 - September 12, Thawhṭanni
Chawnpui 1 -0 FC Venghnuai
CHFC : Lalliansanga 75'
MoM : Vanlalhriatzuala, CHFC