Chanmari-in Chhinga Veng an ngam lo

Zote Honda MPL9-ah Chhinga Vengin chak hmel an hmu ta a, nimin khan Chanmari FC 2-0 in an hneh. Chhingcows tan hian Lalthankhuma leh Lalchhanchhuaha (Jerry) ten hun chanve hmalam leh hnulamah an khung.

Chhinga Veng hian I Day Football-ah Chanmari hi an hneh tawh a, MPL-ah an hneh nawn leh ta a ni. Lalremruata leh Anand Gurung hote hian MPL match hnih khelh tawhah goal an la chhuah lo a, point li an hmu tawh a ni.

Goal khat phawt

Chanmari leh Chhinga Veng te inkhelah ruah a sur a, beisei angin bul an ṭan thei lo. Ball pass thiam Chanmari lamin an theihna an lantir thei lo a, Chhingcows pawhin an ṭhat dan ber an lantir thei bik lo.

Chanmari tan Electric Veng an hneh ṭuma chakna goal khungtu F. Lalnuntluanga'n (Tluangtea) bul a ṭan tawh a, Chhingcows tlarhnung tan a hnawksak.

Chutihrualin goal hlauhawm erawh Lalremruata ke aṭangin a chhuak a, Chanmari wing back Remruata goal shot leh freekick pet chu Chhinga Veng keeper RS Lallawmzuala ṭha takin a dang.

Chhinga Veng pawhin a khat tawkin chance an nei a, Serchhip tlangval Lalrinzuala'n goal la khung lo mah se tun MPL-a striker hlauhawm ber a la ni.

Chhingcows midfielder Johny Lalremruata'n freekick aṭangin crossbar a pet per a, Serchhip tlangval ball pet thiam zarah goal erawh a luh phah ta tho. Minute 43-naah Johny corner pet chu Cherhlun tlangval TK-a'n a tauh goal. First half-ah 1-0 a ni.

Goal khat dang

Chanmari lamin point an mamawh, mahse Chhinga Veng zawkin goal an khung belh. Minute 50-naah Keifang rawlthar Jerry chuan M. Lalpektluanga ball pek chu box pawn aṭangin goal kilah tak a hlai lut.

Chhinga Vengin 2-0 a hma an hruai tak avangin an dinhmun a ṭha a, Chanmari tan erawh risk lak a ṭul. Coach Chhinga'n goal beiseiin Jacob Lalhmangaiha, Lalramchullova leh Zakaria Lalhriatpuia te luhtir mah se Chhinga Veng tlarhnunga ding Abel Lalruatfela leh Lalbiakhlua te an tlang thei lo.

Hun tawp dawn hnaihah midfielder ball thiam C. Lalhunmawia (Lahuna) ball vawrhluh chu Chhingcows defender Abela'n a tauh sual a, Chanmari forward Lalnunzira Sailo-in keeper chauh hmachhawn mah se goal zawnah a tauh lo. Chhinga Veng keeper RS-a'n a game hnihah goal a la chhuah lo.

Duhthusam lo

Chhinga Veng FC coach Lalremruata chuan, "Hnehna kan chan avangin kan lawm a, kan khelh dan erawh duhthu a la sam lo. Kha aia ṭhaa khel thei kha kan ni a, hmasawn kan mamawh a ni," tiin a sawi.

Chanmari coach Rochhingpuia chuan, "Goal khung theihna chance kan nei a, kan khung lo. Kan khingpuite erawhin an chance neih an khung a, chu chu kan danglamna a ni. Match hmasa ber zawh khan training kan nei thei lo a, khelmualah a nghawng a lang," tiin an khelh danah a lungawi loh thu a sawi.

Round 2 - September 12, Thawhṭanni
Chanmari FC 0 - 2 Chhinga Veng FC
CVFC : Lalthankhuma 43'; Lalchhanchhuaha (Jerry) 50'
MoM : Lalthankhuma, CVFC