Ferrari hmunpuiah Verstappen a chak

Formula 1 team hlun leh ropui chu Ferrari an ni a, an hmunpui chu Itlay-ah a awm. Italian team hian an rama inelna neihah chuan ṭan rawn an hlawh ṭhin a, record pawh an nei ṭha. Mahse, Max Verstappen chu an dang zo chuang lo.

Pathianni zana tlan zawh tak Italian Grand Prix-ah Verstappen a tlan chak ber a, tun hnaiah a zawnin vawi nga a chakna a ni. Season kal laiah Red Bull driver hian ṭum 11 zet hnehna a chang tling tawh, inelna an neih leh hunah champion thut thei a ni der tawh.

Dutch tlangval Verstappen-a elpui ber Charles Leclerc chu pahnihnaah a thleng a, driver championship lamah pawh an pahnih inkarah hian point 116 a awm tling ta, intlansiak vawi 16 an hmachhawn tawhah Max a chungnung fal hle.

October 2, Pathianni hian Singarope Grand Prix an tlan dawn, zana intlansiakah hian Verstappen-a'n amah hnaih bertu Leclerc aiin point 22-a a hmu tam a nih chuan a champion thei dawn, chet fuh bakah elpui a chet fuh loh tel a la ngai tihna a ni.

Red Bull boss Christian Horner chuan, "Max, he hnehna hi i phu a ni. I bul ṭanna leh a tir lama i tlan danah kha chuan hnehna chan kha beisei san ngam a harsa, mahse a rei hnuah erawh rinhlelh tur engmah a awm lo," tiin an driver a chhuang hle.

Car intlansiakna sang ber hi tun season chhungin - Singapore Grand Prix, Japanese Grand Prix, United States Grand Prix, Mexico City Grand Prix, Sao Paulo Grand Prix leh Abu Dhabi Grand Prix te tlan hmabak an la nei.