Asia Cup champion Sri Lanka

T20 hmanga inelna Asia Cup-ah Sri Lanka chuan Pakistan hnehin an champion. Pathianni zan khan Dubai International Stadium-ah final hi khelh a ni a, 23 runs-in Lions an chak.

Sri Lanka hian Asia Cup match hmasa berah Afghanistan hneh lo mah se match hnihna aṭangin an insiamrem a, tlawm ni hmel an nei tawh lo. Lions hian Afghanistan hi Super 4-ah an hneh tawh a, final-a an hneh Pakistan bakah India thlengin Super 4-ah an hneh vek

Ṭhumvawr a pawimawh?

Asia Cup-ah final hmain match 12 a awm a, match thumah chauh bat hmasa zawk an chak. Final-ah pawh ṭhumvawr a pawimawh tih a chiang a, a vannei zawk Pakistan captain Babar Azam-a'n rin lawk ang ngeiin vawm hmasak a thlang.

Sri Lanka hmabak a harsa dawn tih chiang mah se captain Dasun Shanaka thlir dan a dang thung. Shanaka chuan, "IPL 2021-ah khan Chennai kha bat hmasa chungin hnehna an chang a, chu chu ka rilrua lo awm chu a ni," tiin a sawi.

Final chu

Sri Lanka-in bul an ṭan ṭha lo a, opener Kusal Mendis-a'n run a siam lo a, Pathum Nissanka pawhin run riat chauh a siam.

Lions beiseina chhi nung turin Dhananjaya de Silva-a'n 28 runs a siam a, hmun hima team dahtu tak erawh Bhanuka Rajapaksa niin thi loin 71 runs a siam. Over 20-ah Sri Lanka hian 170/6 runs an siam.

Pakistan tan target awlsam a ni lo a, umphak theih loh erawh a ni lo. Mohammad Rizwan a che ṭha a, 55 runs siam mah se captain Babar Azam a che ṭha lo.

Babar Azam hian Asia Cup a hmang ṭha lo a, match ruk a khelhah 20 runs chunglam vawi khat chiah a siam a, a run siam belhkhawm chu 68 runs chauh a ni.

Pakistan-in squad an neih chhah loh an tuar a, Rizwan thlawp tur an nei lo. Shaheens-in over 20-ah 147 runs chauh an siam a, Super 4-ah an hmelma India hneh mah se an tum ram an thleng thei ta lo.