Inkhel sawi hlawhah Juve chak zo lo
Juventus striker Arkadiusz Milik-a'n hun tawp dawnah chakna goal a khung emaw a ti a, a hlawhchhuah chu 'red card' mai a ni. Pathianni zan Serie A inkhelah Old Lady leh an mikhual Salernitana te 1-1 in an inhnehtawk.
Allianz Stadium-a inkhelah Salernitana lamin Antonio Candreva-a volley luh leh Krzysztof Piatek-a penalty hmangin 2-0 in hma an hruai, anmahni mualah Massimiliano Allegri-a naute an khel ṭha lo a, nasa taka mualpho thei dinhmunah an ding.
Second half-ah defender Gleison Bremer-a tauh luh hmangin Juve lamin beiseina an insiam thar, mahse goal dang erawh an khung belh mai thei lo. Minute 93-naah penalty an hlawh chhuak a, defender Leonardo Bonucci pet chu Salernitana goalkeeper Luigi Sepe-a'n a lo dansak.
Ball per hi Bonucci bawkin a lo pet zui a, dan hman lohin a goal. Hamrik hnuhnung a la ri lo chiah, striker Milik chuan an goal thumna a khung zui a, a goal khung lawm nan hian a jersey hak lai a phelh.
Mahse, video assistant referee (VAR) hmanga endik niin a lo offside si, goal hi hnawlsak a ni a, card a hmuh erawh a kal tlang. A hmain yellow card a lo hmuh tawh bawk avangin hnawhchhuah a ni ta tho.
Inkhel boruak a sang a, hun tawp dawna buaina chhuak vangin Salernitana defender Federico Fazio leh Juventus full back Juan Cuadrado ten red card an hmu, a la tawp mai lo - Juventus manager Massimiliano Allegri pawh an hnawt chhuak.
Italian manager Allegri chuan, "Tihsual pahnih chauh kan nei a, chumi pahnihah chuan goal kan chhuah. Season kal laia a vawi khat nan chawlhlawk laiin si kan phur, second half-a kan insiamṭhat dan erawh a lawmawm, result erawh duhthusam a ni chuang lo," a ti.
Allegri naute hi tun hnaiah an result a ṭha lo. An match hnuhnung pathumah chak ni hmel an hmu lo vek, season hmasa khan Turin club hi Serie A-ah palina an ni hram, an player neih leh pawisa hman dan chhut chuan an dinhmun hi lawmna tur a ni lo.
Champions League-ah pawh Paris St-Germain 2-1 in an ngam lo hlim. Nilaini zan hian group match khel turin Benfica an mikhual zui leh nghal dawn a ni.
Italy - Serie A
Atalanta 1 - 1 Cremonese
Bologna 2 - 1 Fiorentina
Lecce 1 - 1 Monza
Sassuolo 1 - 3 Udinese
Lazio 2 - 0 Verona
Juventus 2 - 2 Salernitana