Real tan La Liga a awlsam

Carlo Ancelotti enkawl Real Madrid-in La Liga champion nomawi humhim an tumna kawngah harsatna an la tawk lo - Pathianni zan khan an mikhual Real Mallorca chu 4-1 in an sawp a, league match nga an khelh tawhah an la chak vek!

Mallorca hian Vedat Muriqi hmangin goal hmahruai khung mah se Real tan Federico Valverde, Vinicius Jr, Rodrygo leh Antonio Rudiger hmangin an chhanglet a, an chak chiang hle.

Real hian Champions League-a 3-0 a Celtic an ngam ṭuma inhliam Karim Benzema chu an chhawr thei rih lo a, mahse, an striker chhuanvawr tel lo pawhin goal khung kawngah harsatna an tawk lo.

Rin loh lam

Real tan Benzema a awm loh avangin Celtic laka goal khungtu Eden Hazard chuan tlarhma a luah lum a, Vinicius leh Rodrygo ten an thlawp bawk - Mallorca lakah chuan la ṭha tak an ni a, mahse, rin loh zawk team hian goal an khung hmasa.

Mallorca tan hian Kosovan striker Muriqi chuan minute 35-naah goal hmahruai a khung a, goal hi Sourth Korean attacking midfielder ṭhangduang Lee Kang-in siamsak a ni - Real an hawihai.

Mahse, Ancelotti naute an hnufual reng lo - first half hun pek belh minute thumnaah Valverde chuan ṭha zetin goal a khung a, Dani Ceballos siamsak a ni. Season hmasaa Arsenal-a loan-a hun hmang Ceballos hian tun season-ah league match nga a khel tawh a, khelmualah minute 110 hun a hmang tawh.

A sur e

First half-ah goal dang lut loin chawlhlawk hman a ni a, second half-ah erawh a sur thung - Vinicius chuan tun season-a a goal ngana khungin Real hi hma a hruaipui a, minute 89-naah Rodrygo chuan ama thawhrah sengin a khung belh a, Rudiger chuan hun pek belhah chak nemnghehna goal a khung bawk.

Germany international Rudiger hian nipui transfer-ah khan Chelsea aṭangin Real Madrid hi free transfer-in a zawm a, Mallorca laka a goal khung hi Madrid tana a goal hmasa ber a ni. Hetihlai hian Ancelotti chuan buaina chinfel tur a nei - tun season-a minute 17 chiah khelmuala hun la hmang Marco Asensio a lungawi lo.

Minute 70-naah hliam vanga Lucas Vazquez lakchhuah a nihin Dani Carvajal chu luhtir a ni a, hemi hmaa in warm-up tura tih Asensio a lut lo - a lungawi loin a kawr a vawm a, cool box petin a tui um a paih bawk. Ancelotti chuan, "Thil pangngai a ni a, hmun pawimawh chan a duh a ni," tiin a hriatthiam thu a sawi.

September 09, Zirtawpni Zan
Girona 2 - 1 Real Valladolid
GIR: Reinier Jesus 21'; Oriol Romeu 88'
REV: Monchu 38'
September 10, Inrinni Zan
Rayo Vallecano 2 - 1 Valencia
RAY: Isi Palazón 5'; Nico González 52' (OG)
VAL: Mouctar Diakhaby 90+3'
Espanyol 2 - 3 Sevilla
ESP: Joselu 45' (P); Martin Braithwaite 62'
SEV: Erik Lamela 1'; 26' José Ángel Carmona 26', 45'
Cadiz 0 - 4 Barcelona
BAR: Frenkie de Jong 55'; Robert Lewandowski 65'; Ansu Fati 86'; Ousmane Dembele 90+2'
Atletico Madrid 4 - 1 Celta Vigo
ATM: Angel Correa 9'; Rodrigo de Paul 50'; Yannick Carrasco 66'; Unai Nunez 82' (OG)
CEL: Gabri Veiga 71'
September 11, Pathianni Zan
Real Madrid 4 - 1 Mallorca
REM: Federico Valverde 45+3'; Vinícius Jr 72'; Rodrygo 89'; Antonio Rudiger 90 +3'
MAL: Vedat Muriqi 35'
Elche 1 - 4 Athletic Bilbao
ELC: Ezequiel Ponce 59'
ATB: Nicolás Fernández Mercau 9' (OG); Oihan Sancet 14' (P); Nico Williams 22'; Álex Berenguer 44'
Getafe 2 - 1 Real Sociedad
GET: Enes Ünal 45+5'; Carles Aleñá 48'
RES: Brais Méndez 50'
Real Betis 1 - 0 Villarreal
REB: Rodri 61'