Arteta enkawl Arsenal an phur thar

"Emirates Stadium chhungah ka kal kual a, lawm avanga hlim hmel, ding chunga phur taka min lo lawm leh thatho tak tak hmel ka hmu bawk. Fans chungah ka lawm, ka thil duh chu ka hmu a ni," tiin Arsenal manager Mikel Arteta chuan Manchester United an hneh zawhah a sawi.

Gunners manager thar hian ngui leh nguai taka awm mek North London club chu beiseina neih thartir lehin a dinthar mek. Arteta hian manager puitling a nih hnua hnehna a channa hmasa ber atan Man United chu Nicolas Pepe leh Sokratis Papastathopoulos te goal hmangin 2-0 in a hneh.

Ole Gunnar Solskajer-a enkawl United hian tun season chhungin Big Six team zinga mi Liverpool (1-1) an inhnehtawk pui a; Chelsea (4-0), Manchester City (2-1) leh Tottenham (2-1) te an hneh vek. Artetea enkawl Arsenal hi United hneh theitu hmasa ber an ni. 

Nikum December 20 khan Arsenal chuan an captain hlui Mikel Arteta chu 'head coach' atan an lalut a, kum thum leh a chanve daih contract an ziahpui. An inrem dan aṭangin club thuneitu lamin insiamremna hun an pek bakah, hun rei zawk awm tur an thlir tih a hriat theih.

Spanish manager hian hun rei lote chhungin Arsenal hi a siamṭha nghal vek thei lo ang tih chu thil chiangsa a ni. Premier League table laihawl vela inham buai lai an nih avangin a hna pawh a hautak hle ang tih chu a chiang hle.

Hna a zawmtirh hian Arteta chuan, "Hlawhtlinna sang chang phak turin kan khelh chhuah a ngai. Chumi tur chuan hna thawh tur tam tak kan nei tih erawh ka hria, mahse thawhrimna leh chhelna nen chuan kan ti thei ang," tiin a sawi.

Arsene Wenger-a'n player a nih lai pawh a 'Team enkawl tura theihna nei' tia a lo sawi tawh Arteta hian a hna hmasa atan player rilru put hmang thlak danglamsak a tum nghal a, phur leh thatho taka khel chhuak turin a naute a fuih nasa hle.

Arteta-a'n ni li vel bawr training a neih pui hnuah Bournemouth an tlawh a, 1-1 in an inhnehtawk. December 29 khan Chelsea an mikhual zui a, hnehna chang tura an inngaih hnuah hun tawp dawna goal hnih an chhuah avangin 2-1 in anmahni mualah an tlawm.

Chelsea nen an inkhelh ṭumin Gunners keeper Bernd Leno-a'n ball a zuan sual avangin goal an chhuah a, an elpui laka an tlawm avangin player an ngui hle. Inkhelh banah kum 18 mi Bukayo Saka chu ngui takin khelmualah a ṭhu.

Arteta chu khemualah rawn lutin ngui taka awm Lucas Torreira a kuah a, rilru na taka awm Saka chu ding tura koin inthing harh turin a ti bawk. Leno chungchang sawi bawkin, "A tihsual vanga point kan hloh a nih chuan a tuarin hrehawm a ti ngei ang, thil nihdan phung a ni.

Amaherawhchu, he club a rawn zawm tirh aṭang khan hna ṭha tak takin a hnawk hnem tawh," tiin German keeper chu tisual palh thei mihring a nih ve tho thu a sawi, ani hian United lakah a tisual nawn tawh lo.

Emirates Stadium-ah Manchester United an mikhual zui a, inkhel thunun tak chungin huaisen takin hnehna an chang. Neuh neuh ngah tak Mesut Ozil chu number 10 player a ni leh tawh a, captain nihna an hlihsak hial Granit Xhaka chu chhuak tura duhtu aiin cham se tia duhtu an tam leh tawh zawk ngei ang - Arteta effect vang a ni.

Arsenal defender Sokratis chuan, "Arteta hi manager ṭha tak a ni tih chu hun rei lote chhungin kan hre nghal, thil thar thlen duh mi a ni. Tu pawhin 100% in kan thlawp tur a ni, tunah chuan kan sawiho tawh ang ngeiin hnunglam thlir loin hmalam kan en ang," a ti.

Arsenal hi season an hman chhiat em avangin an dinhmun pawh a hniam hman hle. Match 21 khelh tawhah point 27 an nei a, 10-na dinhmun an luah mek. Palina Chelsea an phak lohna chu point kua zet a la ni, a sang pali zinga tel tur pawhin hna a hautak tawh dawn hle.

Tlarhnung pawp thawmphui hi Arteta hna pawimawh a ni chhunzawm dawn, khup hliam vangin Calum Chambers chu zai a ni - thla ruk aṭanga thla kua vel zet a chawlh a ngai ang. Kieran Tierney pawh a dar (shoulder) hliam an zai avangin March thla velah training a zawm ve leh chauh dawn a ni. Player hliam an nei a, a khel thei zingah nghet lo an awm bawk. 

Midfielder Granit Xhaka pawh Bundesliga club Hertha Berlin nen sawizawm mek a ni. Arteta chuan, "Kan mamawh a, kan hnenah awm zel se ka duh," tiin Swiss international chu chelh a duh thu a sawi - khelmual chhung bakah a pawn lamah Arteta hian hna thawh tur a ngah chho dawn hle.