Khawvela phanihna PV Sindhu
PV Sindhu chuan World Badminton Championship 2017-ah India ram tan silver medal a hlawh chhuak. Pathianni zan khan Glasgow-ah final khelh a ni a, darkar khat leh minute 50 zet an inkhelh hnuah Japan nula Nozomi Okuhara chuan 19-21, 22-20, 20-22 a Sindhu hnehin a vawi khat nan world champion a ni.
Rio Olympic silver medalist Sindhu hian feet 5 leh inch khat chauha sang Okuhara laka hnehna chang turin vanneihna a nei tam tawk lo a, game thumnaah a khingpuiin match point a hmuh hmasa zawkah inchhanhim thei mah se a hnuhnung zawk erawh a dang zo lo.
Kum 22 mi Sindhu chuan, "Ram tan medal kan hlawh chhuak a, India tan chuan Saina Nehwal nena medal pahnih kan hawn hi inchhuanna tham a tling ve chuan ka hria. A ṭha ber nih duh mah ila vanduai chang a awm a, nakinah chuan pakhatna nih theih ka la inbeisei," tiin a sawi.
Kumin World Badminton Championship-ah hian Indian tan world number 1 hlui Saina chuan bronze medal a hlawh chhuak ve bawk a, mipa lamah erawh medal dawng phak an awm lo.
Mipa singles final-ah Chinese legend Lin Dan chu Viktor Axelsen lakah 20-22, 16-21 in a chak lo a, world number 3 Axelsen hi Denmark tlangval zingah world champion ni thei pathumna a ni.
Final Results
Event Gold Silver
Men's Singles Viktor Axelsen Lin Dan
Women's Singles Nozomi Okuhara P. V. Sindhu
Men's Doubles Liu Cheng Mohammad Ahsan
Zhang Nan Rian Agung Saputro
Women's Doubles Chen Qingchen Yuki Fukushima
Jia Yifan Sayaka Hirota
Mixed Doubles Tontowi Ahmad Zheng Siwei
Liliyana Natsir Chen Qingchen