Liverpool-in Arsenal hnuaichhiah

Jurgen Klopp-a kaih­hruai Liverpool chuan Arsenal 4-0 in an sawp.

Pathianni zan Premier League inkhelah Reds tan Roberto Firmino, Sadio Mane, Mohamed Salah leh Daniel Sturridge ten a khat mawi tawkin goal an khung a, Gunners manager Arsene Wenger tan Anfield chu zahna kawn mai a ni.

Champions League playoff khel zo hlim Liverpool tan Hoffenheim hnehtu player zingah keeper Simon Mignolet aiah Loris Karius luhtir a ni a, right back Trent Alexander-Arnold chu Joe Gomez-a'n a thlak bawk. Klopp-a'n kar laihawla inkhel hah player pahnih a siksawi. Barcelona hel­lai Philippe Coutinho chu hliam vangin squad-ah telh a la ni lo.

Arsenal player manto ber Alexandre Lacazette leh striker Olivier Giroud te bakah defender tharum ngah Sead Kolasinac te chu bench-ah dahin forward Alexis Sanchez leh Laurent Koscielny ten tun season-a a vawi khat nan inkhel bul an ṭan thung. Season hmasaa league goal hnih chauh khungtu Danny Welbeck chu tlarhmaah mal tlattir a ni.

Goal li chu

A bul aṭanga tawp thleng­in Liverpool an chung­nung a, a khat tawkin Arsenal tlar­hnung tan hna hautak an siamsak deuh reng. Minute 17-na lekah Joe Gomez-a cross chu box chhunga vengtu nei lo Roberto Firmino-a'n a tauh goal.

Senegal international Mane tan an goal hnihna khung turin kum 21 mi Rob Holding chu player satliah a ni. Kum 25 mi Mane hian goal khung turin a duh tawka ball a tlan pui bakah hmuruak a nei zau a, Gunners lakah a zawnin league goal thum a khung ta.

Goal hnih an phurh hnuah Gunners lamin tlarhnung pawp chungin attacking game an khel zui a, corner an pet aṭanga ball kal chhuak chu Spain international Hector Bellerin-a'n a dang sual a, ball per nang fuhtu Salah chuan yard 70 vel zeta thui ball a tlan pui hnuah nuam sa takin goal thumna a khung. Arsenal-in corner an pet leh Salah-a goal luh inkar hi second 12 chiah a ni.

AS Roma aṭanga Reds zawmtu Salah hian goal a khung bakah Nacho Monreal paltlangin Gunners tlarhnung a chhaih buai fo a, Liverpool tan goal thum khung tawhin Chelsea tana a khelh laia a goal khung zat goal hnih aiin a khung tam der tawh. Egyptian winger Salah hian Sturridge goal khung tur a siamsak zui leh bawk.

Reds an hriam

Luis Suarez -a'n Barcelona a pan san hnuah Liverpool hian a aiawh zo an la hmu loa ngaih a ni. Uruguay international anga player mal inkhel thlak danglam hlawk thei an la hmu lo a nih pawhin tun hnaia Mane, Salah leh Firmino te chetdan hi chuan Reds fans lung a ti awi khawp ang.

Pound makatduai 34 man Mane-a'n tun season Premier League match thum a khelhah goal a la khung vek a, Robbie Fowler (1994-95) leh Daniel Sturridge (2013-14) te hnua hetiang dinhmun luah thei hmasa ber a ni.

Brazil international Firmino hian kum 2015 August thla hnu lamah match khata goal khung leh assist neih kawp vawi riat a nei tawh a, hun hman chen inangah hemi kawngah hian record a nei ṭha ber. Reds tana Salah ṭangkai zia chu Gunners fans lam bawkin an hmu chiang ang.

I dâwn tawi lua...

Arsenal manager Wenger hi pa fing leh thil ngaihtuah thui tia sawi ṭhin a ni. Reds hmachhawn tur player a thlan danah erawh manager fing tia sawi huai ngam a har khawp ang.

Attacking game khelh tum Wenger-a'n pound maktaduai 52 man Lacazette leh striker palian Giroud bench-ah a dah a, contract thar ziak duh lo Sanchez-a'n beisei a phak loh zanah Mesut Ozil a nil bawk. Tlarhnungah player thar Kolasinac lah Germany international defender Shkodran Mustafi te aiin Monreal leh Holding te a ring zawk a, Wenger-a thutlukna hian sawi zui a hlawh.

French manager-in inkhel pawimawhah duh taka a lakluh leh tawnhriat nei player bench-a a ṭhuttir hi Gunners ṭantute tan hriatthiam a har khawp ang.

Eng nge an sawi?

League match thum khelh aṭanga point thum chiah la hmu Arsenal-in Anfield an tlawh ṭum hian goal zawnah an pet miah lo! Attacking game khel

ṭhin club tan mualphona a tling. League bikah chuan kum 2015 Boxing Day (Southampton 4-0) hnua an chak loh chian ber ṭum a ni.

Gunners manager Wenger chuan, "Kan chak loh chhanah buaina bulpui ka niin an ngai a, pawi ka tiin ka inthiam lo hle. Chutih rualin kan chak loh niah pawh fans lam hi min thlawp hram turin ka sawm a, kan tih theih awmchhun chu ṭha zawka rawn kir leh a ni," tiin a sawi. Wenger hian season hnih daih contract a ziak thar a, hmang zo tur chuan result ṭha a neih a ṭul ang.

Liverpool hian Champions League group stage khel tura an inpet zawh chiah hnuah inkhel hautak an hmachhawn leh nghal, Reds manager Klopp chuan, "Kar laihawla inkhelh chauh hnuah match huatak kan hmachhawn leh dawn a nih chuan insehruh a ngai hle. A bik takin kan taksa a chak ṭhat a pawimawh a, kan duh leh mamawh ang takin kan khel chhuak thei a ni," a ti.

Keeper thlak chungchang sawi zuiin Klopp chuan,"Simon Mignolet hi kan number 1 keeper a la ni reng. Goalkeeper ṭha tak pathum neih kan duh a, player ṭha kan neih tam chuan Simon tan chawlh a pek theih. Chawlh a dil a ni hran lo a, a tan taksa hahchawlhna aiin rilru hahdamna hun a ni zawk," tiin a keeper a chawlhtir chhan a sawi.