Chelsea leh Morata an par

Stamford Brigde-ah Chel­sea-in inkhel thunun chungin Everton 2-0 in an hneh a, Pre­mier League champion lai hian Burnley an hneh loh nghal hnuah match zawnin vawi hnih an chak.

Pathianni zan inkhelah Alvaro Morata chuan minute 27-naah Cesc Fabregas goal khung tur a siam sak a, Spanish striker hian minute 40-naah a hnampui Cesar Azpilicueta cross chu a tauh goal leh bawk.

Chetsual palh

Chelsea hian Premier League ṭan niah Burnley 2-3 in an hneh lo a, hemi ṭum hian captain Gary Cahill leh midfielder Cesc Fabregas te hnawhchhuah an ni.

Antonio Conte hoten fiahna hau tak an hmachhawn zui a, champion tura an elpui Tot­tenham Hotspur leh sum hmang hnem Everton an hmachhawn nghal. Wembley Stadium-ah Cahill leh Fabregas tel loin Spurs an hneh a, Blues-in result hmangin anmahni sawiseltute an chhanglet.

Stamford Bridge-ah sum hmang hnem Everton an hmachhawn a, Burnley an hneh lohna hmunah hian harsatna an tawk nawn lo. Minute 27-naa Spanish midfielder Fabregas-a'n cool zeta a khung hnuah chak zawk tur a chiang a, minute 90 chhungin Toffees-in goal zawnah an pet lo.

Chelsea an mualah an che­sual nawn lo a, Burnley nena an inkhelh ṭum kha chu khelhfuh loh ṭum a ni. Italian manager Antonio Conte-a'n tlarhnung a rem phui leh tak avangin champion tur zingah Blues sawi hmaih a thiang lo.

Morata a fuh

Chelsea-in Romelu Lukaku an chang lo a, manager Conte-a'n season liam taa an top scorer Diego Costa koh let a tum tawh lo.

Belgian striker Michy Bat­shuayi-a'n season khatnaah beisei a pha lo a, hei vang hian striker ṭha an mamawh. London club hian an club history-a manto ber ni turin pound maktaduai 60-in Alvaro Morata chu Real Madrid

aṭangin an lalut a, Spanish striker hian match thumah goal hnih khungin assist vawi hnih a nei der tawh a, khelmualah erawh a theihna ang tak a la lantir lo.

Tharum hman tamna hmun Premier League-ah 6 ft 2 in-a sang Morata-a'n goal leh assist vawi hnih ve ve nei tur hian a lu vek a hmang a, Spanish striker hi boruak bakah leiah a ṭhat tel avangin a theihna phochhuahin a awm zel ang.

Inthuam ṭhat mamawh

A hote khelh danah Chelsea boss Antonio Conte lawm mah se inthuam ṭhat an mamawh tih erawh a pha lo. Italian manager chuan, "Transfer tawp nan ni tam a awm tawh lo a, kan squad tichhah tur hian club pawh a thawkrim tih ka hria. Player ka thlak kual a ngai a, chumi tur chuan squad neih chhah ka mamawh a ni," tiin inlak belh an tum thu a a sawi.

Blues hian Arsenal forward Alex Oxlade-Chamberlain, Leicester midfielder Danny Drink­water leh Toffees midfielder Ross Barkley te an la beisei a, an lak vek theih loh pawhin lakluh an neih ngei erawh a rinawm.

Chhuanlam nei Toffees

Everton-in ni sarih chhungin Manchester City, Hajduk Split (Europa League) leh Chelsea te an hmachhawn a, inkhel pawimawh vek a nih avangin Stamford Bridge an thlen meuh chuan an chau tih hai rual a ni lo.

Toffees boss Ronald Koe­man chuan, "Kan khingpuite an ṭhat avangin khelh a harsa lehzual a, first half-a kan khelh dan kha a lawmawm loh a, tihsual kan ngah hle. Second half-ah erawh huaisen takin kan khel a, a tawp thlengin theih­tawp kan chhuah a ni," tiin bul an ṭan fuh loh thu a sawi.

Striker pakhat an la mamawh thu sawiin Dutch manager chuan, "Hun rei lote chhunga match tam tak khelh a ṭul chuan player 11 chauh chuan ṭha takin a khelh theih loh. Sandro-a'n Premier League-a che ṭha turin hun a mamawh a, Dominic Calvert-Lewin lah kum 20 chauh a ni. Striker pakhat chu kan la mamawh a ni," a ti.