Vanglaini Biangbiakna ; Indian football tan MPL a hlu - Chirag Tanna

Reliance Sports general manager Chirag Tanna chuan August 25 zan khan Mizoram Premier League season 6 kick off-na hun a nei. Tuna Indian Super League thluak bur ber anga an sawi Chirag chuan, "Indian football tan MPL hnathawh hi a hlu a ni," tiin Vanglaini hnenah Mizorama club football inelna sang ber chungchang a sawi.

Tu nge Chirag?

India rama league ngaihven hlawh ber chu Indian Super League a ni a, IMG-Reliance enkawlna hnuaia awm a ni. Chu Reliance hnuaiah chuan an sports division lam enkawltu bik an awm a, chuta an puipa zinga mi chu Chirag Tanna hi a ni.

Chirag hian Pune FC-ah Head of Operations dinhmun chelhin football-a a zinkawng a zawh ṭan a, Pune club hi India rama 'professional ber' tia an sawi hial khawpa kaihruaiin I League Professional Football Clubs Association (IPFCA)-ah general secretary hial a ni thei.

Reliance lam hotute chil a tiput a, a tirah ISL bika Chief Operations Officer turin an sawm zet a, a aia hna lian zawk pein Reliance Sports general manager ni turin an thlem lut.

CFL chungah MPL

Kum 2012-a Mizoram Premier League ṭan a nih hma khan India rama state league lang­sar zingah Calcutta Football League leh Goa Professional League-te chu sum tam tak sengin hun rei tak kalpui a lo ni tawh a, mah se heng league-te ai hian Chirag chuan MPL a dah sang zawk.

ISL lama an puipa Chirag chuan, "CFL-ah chuan state pawn aṭangin player an lalut ṭeuh ṭeuh a, sum seng hnem apiang an dingchang. MPL-ah chuan nangmahni chherchhuah, in tualchhuang footballer-te ngei in chhawr a, nangmahni leh nangmahni in inpui tawn a ni. Hei hian mi tam tak tan kawng zau zawk a hawn sak zel a, in thawhrah in seng mek a ni," a ti.

ISL bazar-na?

Chirag chuan MPL chu footballer-te tan ­kawng sialsaktu niin, rei lo teah ISL club ten bazar nan an la hman tur thu a sawi.

Reliance Sports hotupa chuan, "MPL hi footballer-ten professional zinkawng ṭan tura kalkawng hmasa ber niah ka ngai a, he league hian footballer te hnenah professionalism awmzia a zirtir a, an tan chuan Indian football luhchilh tura kawng duhawm tak a ni,"

"Lo ngai reng rawh u, tun aṭanga kum hnih velah chuan ISL club-te hian MPL hi bazar nan an rawn hmang dawn. ISL scout-ten MPL an la rawn en ang a, Mizo footballer tam zawkin ISL an la khel ang," a ti a, Mizote tan Indian football-ah kawl a en thu a sawi.

Mahse...

Pune FC-a head of operations a nih laia Mizo rawlthar Jeje Lalpekhlua leh Lalrozama Fanai te tana kawng hawnsaktu Chirag chuan MPL chu ṭha viau mah se fan-te erawhin hmabak an la neih ve thu a sawi.

AIFF League committee-a Reliance aiawha member ni bawk chuan, "Mizoram hi football state tia sawi ngam a ni a, chutihrual chuan hmabak nei lo erawh in ni bik lo,"

"Kawngpuiah Arsenal, Manchester United leh club dang dang jersey ha ka hmu nual a. MPL club jersey ha hmu ila a ropui lehzual ang. Fan-ten an club ṭan jersey lei uar se, chu chuan sum lamah club insenso na lutuk tur a pui thei ang a, local football pawh a nung lehzual ang," tiin fan-te chu an khawtual club an ṭanna kawngah ṭang lehzual turin a fuih.

Thawhhona = Hmasawnna

Tun hnaiah Indian football-in hma a sawn a, national team chu FIFA ranking-ah top 100-ah hial a lang phak. Vanglaini palaiin, "ISL awm tak vang hi a ni mai lo maw?" tia a zawhna chu chhangin Chirag chuan, "ISL vang ringawtin ram pumpui football-in hma a sawn thei lo. ISL, I League, 2nd Division leh MPL club thlengin tha an thawh vek a, kan vaia kan thawhhona avanga tun dinhmun hi thleng kan ni," a ti.

Chirag chuan, "MPL player Jerry Mawi-hmingthanga leh Lalruatthara teho chuan ISL club an nei tawh a, MPL kha an zinkawng inanna a ni. Chutiang chiah chuan Jackichand Singh-te pawh Royal Wahingdoh-in 2nd Division an khelh aṭanga kan hriat an ni a, nangni lamin chherchhuah hna in thawk a, keinin par chhuak turin kan lo chei hnum a ni," tiin football hmasawnna chu league pakhat vanga thleng thei a nih loh thu a sawi.