Federer hmachhawn duh lotu Rafael Nadal
Kumina Grand Slam hnuhnung ber US Open chu nizan aṭang khan khelh ṭan a ni a, seeded pakhatna Rafael Nadal chuan zanin dar 11:45 hian a match hmasa ber atan Arthur Ashe Stadium-ah Dusan Lajovic a hmachhawn ang. Nilaini zing dar 5:45-ah Roger Federer chuan Frances Tiafoe a bitum ve thung ang.
Tennis inelna zinga sum tamna ber US Open bikah hian tennis inelna ropui chhawp chhuaktu Nadal leh Federer te hi an la inhmachhawn ngai lo a, season dang ang bawkin Nadal chuan Swiss star hi hmachhawn loh hram a duh thu a sawi.
World number 1 Nadal chuan, "Semifinal lut ta ila, ani nen intawng thei kan ni. A nihna takah chuan Federer nena inkhelh hi nuamti viau mah ila tun ṭumah hi chuan hmachhawn loh ka duh," tiin a sawi.
Season bul ṭanna Australian Open final-ah khan player ropui pahnih hi an inkhel tawh a, hard court inelna lian hmasa zawkah hian Federer-a'n hnehna changin nomawi a chawi zui bawk.
Grand Slam vawi 15 champion tawh Nadal chuan US Open chungchang sawi zuiin, "He hmunah hian hun hlimawm leh lungchhiat thlak tak tak ka lo tawng tawh. Ka ngaihdan chuan tournament kan khelh hian seeded hi ka dah pawimawh ber lo, nuamti taka khelh hi a hlu a ni," tiin seeded pakhatna ni mah se pressure insiam a tum lo hle.