Asensio ropui zanah Real chak zo lo
Barcelona leh Atletico Madrid ten hnehna an chan laiin Real Madrid erawh kartawp Spanish La Liga-ah an chak zo lo - an mikhual Valencia nen goal hnih ve ve khungin an inhnehtawk a, an rawlthar duhawm Marco Asensio-a'n goal hnih a khung chungin a team hnehna a chanpui zo lo.
Inkhel ṭan aṭanga minute 10 lekah Asensio-a'n Real hmahruaina goal a khung a, yard 20 vela hla aṭangin a khung. Mahse, Santiago Bernabeu Stadium thawm rin chhung a rei lo, minute riat a liam hman chauh tihah 'team move' mawi tak hmangin Carlos Soler chuan an si phurh a sut.
Chawlhlawk hman a nih hnuah Valencia-in hma an hruai ve thung a, Geoffrey Kondogbia chuan minute 77-naah mikhual team tan a khung. Hun tawp nan minute 13 chauh a awm tawh avangin Valencia hi an ṭang tlang thei tura ngaih a ni hman a, mah se minute 83-naah Asensio bawk inlarin freekick hmangin si phurh a sut - goal dang lut turin hun a tam tawk tawh lo a, team pahnihin point an insem.
Real an talbuai
Real Madrid-in hrem vangin Cristiano Ronaldo an la chhawr thei lo a, Portugal captain tel lo hi chuan Real an 'real' tak tak thei lo. Coach Zinedine Zidane-a'n midfielder Casemiro central defence-ah a khelhtir a, hei hi captain Sergio Ramos hrem a nih vang leh hliam vanga chawl mek Raphael Varane leh Jesus Vallejo-te chhawr theih an la nih loh vang a ni.
Zidane-a'n a naute a chakpui zawh loh chhanah Karim Benzema chu puh theih a ni a, French striker hian box chhungah vawi tam hun ṭha a nei chungin goal-ah a chantir thei tlat lo - Santiago Bernabeu-ah tih mualphoin a awm. Hun tawp dawna a chance neih erawh sawisel theih a ni lo a, Valencia keeper Netoa'n ṭha zeta a dan hnuah post a per - a pet goal loh tam zawk erawh ama thiam loh a ni.
Valencia tan Kondogbia leh Jeison Murillo ten an club thar tana an match hmasa ber an khel ve ve a, player pahnih hian Inter Milan aṭangin Valencia hi loan-in an zawm.
Benzema chhantu Zidane
French striker Benzema-a'n sawisel hlawh mah se a boss Zinedine Zidane erawhin a chhan tlat. Real Madrid manager chuan, 'Fan-te chuan an duh dan apiangin hma lo la rawh se. A pawimawh ber chu chance a insiam thei lai kha a ni. Benzema khan goal a khung lo a ni mai thei, mah se a pawi lo e. Hei hi football chu a ni a, hlim taka nuih reng hi a pawimawh hmasa chu a ni," a ti.
Zidane chuan goal hnih khungtu Asensio fak nghalin, "A khelh danah ka lawm a, a chet ṭhat dan khan min barakhaih hran lo. Goal hnih a khung avangin ka lawmpui a, chutihrual chuan mimal chet ṭhat aiin team pumpui thawhrah hi a pawimawh zawk. Asensio hian tun ang renga a khelh ka beisei a, goal pawh a khung zel ang," tiin beiseina a nei sang hle.
Minute 74-naah Gareth Bale lakchhuah a ni a, Real fan-ten beisei anga khel lo Welsh forward hi an au el. Zidane erawhin a player hi fakin, "Squad-a player pawimawh ber pawl a ni a, Gareth chu Gareth a ni reng ang," tiin a rin zel tur thu a sawi.