MMA India aiawh tur Mizo
Mizoram State MMA Association (MISMA) aiawha Bangalore Open National championship 2017 khelh zawh taka feh chhuak Pathianmalsawmdawngliana chuan silver medal a hlawh chhuak a, MMA World championship 2017, Bahrain-a neih turah India aiawh tura thlan a ni.
August 25-28 inkara Bangalore khawpuia inelna neih hi World Championships lo awm tur atana selection a ni nghal a, India ram state 21 aṭangin fighter 250 zet an inlan. MISMA aiawhin PMS-a bakah Lalchhuanmawia chu a feh chhuak ve bawk a, Republic Veng fighter erawh last 16-ah a zinkawng tawpin MISMA technical chairman Samuel Lalrozama chu head referee-in a tel bawk.
Kawrtethawveng tlangval PMS-a hian bantamweight-ah inelna a hmachhawn a, round of 32-ah rear naked choke hmangin Tamil Nadu tlangval a hneh. Last 16 leh quarterfinal-ah a chet ṭhat chhawm nungin Andhra Pradesh leh Rajasthan chu technical knockout hmangin a hneh a, semifinal-ah Telangana aiawh chu point-a hneh lehin final-ah erawh a thlengtu Karnataka chu split decision hmangin a ngam lo.
PMS-a'n beisei angin pakhatna dinhmun luah lo mah se All India Mixed Martial Arts Association hotute mit a tlung avangin Bahrain-a India aiawh tur hian thlan a ni ta tho a ni. Bahrain Prince leh UFC-te sponsor na hnuaia inelna neih tur hi September 12, 2017-ah neih a ni ang.