Mbappe tel loin Monaco chak chiang

Rawlthar ngaihven hlawh Kylian Mbappe tel loin AS Monaco chuan goal khung kawngah harsatna an nei lo. French Ligue 1 champion hian Pathianni zan khan Marseille chu 6-1 in an sawp.

Monaco tan hian striker Rada­mel Falcao chuan goal hnih a khung a, Colombia international hian tun season league match li a khelh aṭangin goal sarih a khung der tawh. Chelsea striker hlui bakah hian Kamil Glik, Adama Diakhaby, Djibril Sidibe leh Fabinho ten goal khat ṭheuh an khung.

Kum 18 mi Mbappe hian an league match hmasa berah Toulouse a hmachhawn a, tun hnaiah a zawnin match thum chu khelmual chhungah tlan luhtir a ni tawh lo. Marseille an hneh ṭum hian bench lamah hun hman tluantir a ni.

French media lam chuan Mbap­pe hi an elpui Paris St-Germain chuan pound maktaduai 166-in an lalut dawn niin an tarlang nasa hle a, transfer bazar khar a nih hma chuan a chanchin hian sawi zui a hlawh rih dawn niin a lang.