Spurs an chak zo lo

Tottenham Hotspur-in Premier League match thum an khelh tawhah vawi khat chiah hnehna an la chang - Pathianni zan khan Chelsea an ngam loh hnua an match hmasa ber ni turin Burnley an mikhual a, 1-1 in an inhnehtawk.

Spurs tan Dele Alli chuan minute 49-naah buai nuaih karah goal hmahruai a khung a, minute 90 thlengin London club hi chak tur angin an lang hman. Mahse, Burnley tan striker thar Chris Wood a inlar a, pound maktaduai 15 man striker hian injury time-ah an si phurh sutna goal a khung.

Wembley vang?

Tottenham-in an khelmual White Hart Lane an sak ṭhat avang­in khelmual atan Wembley Stadium an hmang a, he stadium hmingthangah hian Spurs an chak hleithei lo - match 12 an khelh tawhah vawi hnih chiah hnehna an la chang a, Wembley hman thiam loh vang tih chu mi tam tak ngaihdan a ni.

Mahse, Tottenham manager Mauricio Pochettino-a'n ngaihdan dang a nei thung. Spurs boss chuan, "Wembley-ah mawhpuh tur engmah a awm lo, hnehna kan chan theih loh chhan chu keimahni a ni. Wembley a nih avangin player-te an hlauthawng hran lo a, kan goal chhuah dan kha en ula, Wembley ni loin keimahni thiam loh a ni," tiin chak loh chhuanlam a siam duh lo.

August anchhia?

Tottenham tan tlarhmaah Harry Kane ding mah se English striker hian goal a khung thei lo - season hmasa Premier League-a goal 29 khungtu striker hian league match thumah goal khung a la nei lo. Kane tan chuan August hi 'thla duhawm lo' tia sawi tham a ni - August-a Premier League match 13 a khelh tawhah goal khung a la nei miah lo! Match pathum an khelh tawha vawi khat chiah hnehna an chan theihna kawngah kum 24 mi striker hian mawh a phur thui hle.

Spurs boss Pochettino erawhin a nau hi chhan tlatin, "Player thawkrim tak a ni a, goal a la khung rih loh avangin pawi ka tihpui hle. Goal khung theihna hun pawh a nei ṭhin ngei a, mah se striker hian a chang chuan vanneihna an mamawh tel ve bawk a ni. Chiang taka ka sawi ngam erawh Kane hian goal a khung leh vat ang," a ti a, a striker a ringtawk.