Chelsea boss Potter tan zaninah fiahna hmasa

Dinamo Zagreb laka an tlawm hnuin Chelsea-in coach Thomas Tuchel an ban a, beiseina sang tak nen Graham Potter an lalut - English coach tana fiahna hmasa tura ngaih chu kar hmasaa Fulham nena an intawn tur kha a ni.

Mahse, Queen Elizabeth II thihna avangin kartawpah Premier League inkhel a awm lo a, Potter tana chona hmasa ber chu Champions League a ni ta rup - Potter tan hna a hautak dawn tih a chiang a, zam a thiang lo.

Chelsea hian zanin dar 12:30-ah Red Bull Salzburg an mikhual dawn a, mahni muala khel tur ni mah se Salzburg hi match hmasa bera 1-1 a AC Milan inhnehtawkpuitu an ni a, Potter tan hna a awlsam lo ang.

Potter hian Swedish club Ostersund a enlawl laiin Europa League-ah a team a lo kaihruai tawh a, Champions League-ah em erawh a la kaihruai ngai lo - zaninah fiahna a hmachhawn dawn e.

Risk chu le!
Chelsea-in club lian la enkawl ngai lo Potter lalutin 'risk' an la a, Potter-a'n coach ban ngun tak Chelsea panin 'risk' a la ve bawk - match hmasa berah Champions League a khel nghal dawn bawk si a, English coach hmaa chona inchhawp hi a hautak hle.

Mahse, Potter chuan, "Hringnun chu 'risk' laka innghat a ni a, nuam kan tihna hmun tlansana chona hmachhawnte pawh a ngai ve ṭhin," a ti a, Brighton-a hahdam taka cham ai chuan pressure sang hmachhawn a duh zawk.

Zanina Chelsea hmachhawn tur Salzburg-in hming langsar kawl lo mah se dah hniam erawh a rem lo - league match riat an khelh tawhah vawi sarih an chak a, Champions League-a an match hmasa berah AC Milan chu 1-1 in an inhnehtawkpui bawk.

Chelsea hian match hmasa bera Dinamo Zagreb an ngam loh bawk avangin vawi khat tlawm leh chuan, last 16 luh beiseina a tlem sawt dawn tih a chiang a, Potter tan match hmasa bera tlawm nghal a thiang lo.

Potter-a system
Tuchel-a'n Chelsea-ah 3-5-2 a hmang nasa a, Potter pawhin Brighton-ah he formation hi a uar hle - chuti a nih chuan English coach hian 3-5-2 bawk a rawn hmang tura ngaih a ni a, a hlawhtlinpui ang em, tih erawh hunin a hril ang.

Tlarhnung laiah Wesley Fofana, Thiago Silva leh Kalidou Koulibaly an inkawp a rinawm a, Zagreb laka an goal chhuah dan enin an la inman tawk lo tih a lang a, zaninah chuan insiamṭhat a ṭul tawh.

Right back-ah Reece James a lut ang a, mual vei lamah Potter-a'n Ben Chilwell aiah Brighton aṭanga a hriat chian Marc Cucurella chu a chhawr a rinawm zawk.

Blues tan midfielder pawimawh N'Golo Kante a la inhliam avangin Jorginho leh Matteo Kovacic chu midfield luah tura ngaih an ni a, tlarhmaa inkawp turin Mason Mount, Raheem Sterling leh Kai Havertz an awm bawk - Pierre-Emerick Aubameyang a la awm bawk tih theihnghilh lo ila.

Chelsea lawmna
London club lawmna turin Salzburg damdawi in a lun rih hle - tun dinhmunah Maximilian Wober, Oumar Solet, Kamil Piatkowski, Bryan Okoh, Mamady Diambou, Ousmane Diakite, Samson Tijani, Luka Sucic, Justin Omoregie leh Sekou Koita te chu player inhliam an ni!

Salzburg hian centre back zingah Strahinja Pavlovic chu player in fit an neih awmchhun a ni a, chuti a nih chuan left back pahnih zinga Andreas Ulmer emaw Bernardo ten centre back hna an chelh a ṭul dawn tihna a ni.

Kum 27 mi Bernardo hi Brighton tana lo khel tawh a nih avangin zaninah Potter hrechiangtu defender hi centre back-a a din a rinawm a, Chelsea goal nawr na tak dang turin an ṭha tawk dawn em, hunin a hril thuai dawn.

Tlarhmaah Noah Okafor hian tun season-ah ringawt goal ruk leh assist vawi hnih a nei tawh a, Chelsea tlarhnung pherh tak tan dan dan ngaihtuah a ngai - goal li leh assist vawi thum nei tawh Benjamin Sesko pawh lam hmaih a thiang lo.

Hahdamna
Chelsea-in rin loh taka Tuchel an ban khan coach thar tan insiamremna hun awm loa match hmachhawn nghal a hautak turzia chu thil lang chiangsa a ni - mahse, Blues an vannei a, Fulham nena an inkhel tur an sawn.

London club hian kartawpa Liverpool hmachhawn zui tur ni mah se hei pawh sawn a ni leh ta a, kartawp inkhel ngaihtuah hah ngai miah lo chungin Potter-a'n player a rem thei dawn a ni.

A tawi zawnga sawi chuan Potter tan a ṭha zawng vekin thil a inher a, chuti chunga an chak zo lo a nih chuan English coach tan mualphona tawp khawk a ni ang - group E inkhel dangah AC Milan an inlan dawn bawk.

Italian club hian zanin dar 10:15-ah Dinamo Zagreb an mikhual dawn a, Chelsea ngamtu Croatian club hi an hneh lo a nih ngat chuan an dinhmun a harsa chho tawh khawp ang.