Mizo rawlthar captain-na hnuaiah India

South Asian Football Federation Under-17 Championship final-ah India chu zanin dar 8:00 hian Nepal nen an inkhel dawn a, India U17-ah hian Mizo rawlthar Vanlalpeka Guite (Sentea) chu Captain a ni.

India hian an match hmasa berah Bhutan chu 3-0 in an hneh a, he inkhelah hian Thanglalsoun Gangte chuan goal hnih a khung a, Sentea'n goal khat a khung ve bawk.

Blue Tigers hian match hnihnaah Nepal ngam lo mah se, an group-a team pathum aṭanga pahnihin semifinal an luh avangin, a thiam pali zingah an tel ta tho.

Thawhṭanni zan khan semifinal-ah India hian 2-1 in Bangladesh an hneh a, Manipur rawlthar Thanglalsoun Gangte chuan goal hnih khungin India hi final a hruai thleng.

Colombo Racecourse, Colombo, Sri Lanka-ah India leh Nepal ten zanin dar 8:00-ah final an khel dawn a, inkhel hi Eleven Sports app leh website kaltlangin live-in a en theih ang.

India U17 squad-ah hian Khawzawl attacking midfielder Sentea bakah Champhai attacking midfielder Lalhmingchhuanga Fanai leh Bawngkawn winger Lalpekhlua te an awm bawk.