Inkhel ṭhenkhat an sawn

Queen Elizabeth II thihna chuan tun kar tawp Premier League pawh a la nghawng dawn. Match tam zawk khel thei dawn mah se, lalnu thihna vang hian match pahnih chu inkhelh hun sawn a ngai dawn.

London khawpuiah Chelsea chuan Liverpool mikhual tur an ni a, anni bakah hian Manchester United muala Leeds United lenglut tur chu a hun sawn an ni. Heng bakah hian Brighton leh Crystal Palace inkhel tur chu Communication Workers Union (CWU) hna thawk an nawrh avangin sawn a ni bawk.

Premier League chuan thuchhuah siamin, "Club, police leh tualchhung himna lama mawhphurtu leh mi pawimawh te nen kan sawi khawm a, match pathum hi chu loh theih lohna avangin a hun sawn a ngai," an ti.

England ram lalnu thihna vang hian kar hmasa khan Premier League inkhel tur zawng zawng chu a hun sawn a lo ni tawh bawk a, remchang atan siamrem a ni ang - league bakah European football pawh a nghawng.

Ningani zanah Arsenal chuan Europa League khel turin PSV Eindhoven an mikhual dawn. Emirates Stadium-a inkhel tur pawh hi a hun sawn a ni a, an khelh hun tur erawh tihchian a la ni lo.