EPL-ah Costa a lo kir leh ta

Diego Costa chuan tun season tawp thleng cham turin Wolves a zawm. Chelsea striker hlui hi club nei loa awm lai a ni a, transfer hun tawp tawh mah se lakluh theih a la ni.

January thla khan Brazilian club Atletico Mineiro leh Costa hi an inṭhen, a hnu lamah club nei loin a awm. Kar hmasa khan Wolves nen hian an inrem tawh, Ningani tlai khan medical test a paltlang.

Wolves chairman Jeff Shi chuan, "Diego Costa kan lalut thei hi kan lawm hle, a tlangnelna Premier League-ah a lo kir leh ta a ni. Inelna sang taka tawnhriat nei ṭha leh hlawhtling tawh a ni a, khelmual chhung leh pawnah kan tan a ṭangkai ang," a ti.

Costa hian kum 2014-17 inkar khan Chelsea tan hlawhtling takin a lo khel tawh, league match 89 a khelh aṭangin goal 52 a khung a, assist vawi 16 a nei. Premier League nomawi pawh vawi hnih a chawipui, a sulhnu hnutchhiah hi a ṭha hle.

Blues tan hian season thum chhung chu club tana goal khung hnem ber a ni. Mahse, Antonio Conte nen an inmil lo a, hei vang hian Stamford Bridge a chhuahsan a ṭul, a tan chuan EPl hi thil thar a ni dawn lo.

Kum 33 mi Costa chuan, "A nihna takah chuan Madrid khawpuia inkhelh a nuam ka ti ṭhin. Mahse, Wolves manager Bruno Lage-a'n ka hun hman tawhna Premier League khel tura remchang min siamsak hi hnar thei ka ni lo," tiin a sawi.

Wolves hi Premier League-ah 14-na an ni mek a, season bul an ṭan fuh hran lo. Inrinni zan hian champion lai Manchester City an mikhual ang.