Joshua-a'n Fury chona a pawm

British boxer rothap Anthony Joshua chuan WBC champion Tyson Fury chona zawng zawng a pawm vek a, a management company 258MGT chuan Fury hnen aṭanga chhanna an nghah mek thu an sawi.

258MGT chuan twitter-ah thuchhuah siamin, "258 leh Matchroom Boxing-te chuan Anthony Joshua aiawhin, Fury team-te chona zawng zawng, December-a inhmachhawn tura ruahmanna chu kan pawm e," an ti.

Kum 34 mi Fury hian April thla khan Dillian Whyte a hneh hnuah, inhnek a chawlhsan thu a puang a, mahse, thla hmasa khan he thu hi sut lehin, social media-ah video kaltlangin Joshua hi a cho zui leh a ni.

Thla hmasa lawk khan Joshua hian a vawi hnih nan Oleksandr Usyk a ngam lo a, Ukrainian boxer nen an inremnaah, Joshua hian Fury a hneh theih chuan Usyk nena inhnek nawn theihna dan an ziak tel.

Hetihrual hian Queen Elizabeth II thihna avangin inbiakna hi thui tak kalpui theih a la ni lo a, contract pawh ziah a la nih loh avangin Joshua leh Fury inhnekna tur hmun sawi theih a la ni lo.

Tun dinhmunah chuan Cardiff khawpuia Principality Stadium hming a ri ring viau a, hetihlai hian Saudi Arabia leh middle east-a ram dang hming pawh lam rik tel a ni bawk.

Fury-Joshua thleng tur hian inremna tur erawh a la tam hle - boxer pahnih hian broadcaster hran ve ve an thawhpui a, promoter an hman lah inhal tak an nih bawk avangin thutlukna an siam dan tur hriat a châkawm hle.

Hetihrual hian boxing fan-te tana chanchin lawmawm tak chu Joshua-a'n WBC ranking-a parukna dinhmun a luah leh ta chu a ni - boxer-in world title a fight dawn chuan professional boxing-a pawl hrang hrang hnuaia top 15 tal a nih vek a ngai a ni.