Newcastle keeper thar Loris Karius

Newcastle United chuan German keeper Loris Karius an lalut a, nakkum January thla thleng daih inremna an ziahpui. Kum 29 mi Karius hi club nei loa a awm lai a ni a, an inrem dan chuan season tawp thleng a contract hi pawhsei theih a ni ang.

Magpies hian keeper Nick Pope an nei a, a thachhang dawltu Karl Darlow a inhliam, hei vang hian Pope-a elpui leh a hliam palh thuta a aiawhtu tur an mamawh a, hei vang hian Karius hi an lalut.

Liverpool keeper hlui Karius chuan, "Ka ngaihdan chuan thutlukna dik niin ka hria, ka tana a ṭhat bakah club tan pawh mi ṭangkai ka nih theih ngei ka beisei," tiin a sawi.

Newcastle manager Eddie Howe pawhin an keeper chu Premier League bakah European football thlenga tawnhriat nei ṭha a nih thu a sawi a, season hman tur an la neih rei avangin an hman ṭangkai ngei a beisei thu a sawi ve bawk.

Neitu thar an neih hnuah Newcastle hi an indinthar mek a, duhthusam ang erawh chuan season bul an ṭan fuh lo. Premier League match ruak an khelh aṭangin point sarih an hmu a, table-ah 11-na an ni mek.

September 17, Inrinni hian Bournemouth an mikhual ang.