Neymar faktu PSG coach

Paris St Germain coach Christophe Galtier chuan season duhawm hmangtu Neymar a fak a, a player khelh ṭhat chhan chu a thawhrimna leh khawsak phung a dik vang niin a sawi.

Neymar hian theihna leh thiamna a nei sang, mahse PSG a pan hnuah a laka mipui beiseina ang erawh a phak meuh lo. Tun season erawh Ligue 1 bikah goal riat khungin assist vawi sarih a nei tawh bawk.

League chauh a ni lo, Champions League match hmasa bera Juventus an hneh ṭum pawhin Kylian Mbappe goal hmasa tur a siamsak bawk. Zanina Maccabi Haifa an hmachhawn hunah pawh dinhmun pawimawh a luah ang.

Galtier chuan, "Kei leh ka thawhpuite vang a ni lo, amah hian theihna sang tak a nei sa. Tum sang tak a nei a, chumi tihlawhtling tur chuan a thawkrim hle bawk, goal khung bakah a venhim lamah pawh a thawh hlawk hle.

"Goal khungtu a ni a, ṭhiante khung tur siamsaktu a nih bakah inkhel cheimawitu a ni tel bawk. A taksa a hrisel ṭhain a inhliam lo a nih phawt chuan player ṭha leh hlauhawm bik a ni," tiin Neymar a fak hle.

PSG hian Ligue 1 roreltu nih ringawt an duhtawk lo. European champion nih an duh - Neymar, Lionel Messi leh Mbappe te nei kawp chungin UCL chawi an tum leh dawn, hliamin a tibuai a nih loh chuan team hlauhawm berte zinga mi an ni ang.