Pro Muaythai inelna a hnai

Mahindra Pickup 4x4 LPS Pro Muaythai-a tel turten entry form an la chhuak ṭan a, lawmman Rs 3,60,000 awmna turah hian infiammi an inlan hnem a rinawm.

October 7 aṭngin R. Dengṭhuam Indoor Stadium, Mualpuiah khelh ṭan tur a ni a, kum 15 aṭanga 45 inkar a duh apiang tan September 12 aṭangin LPS Office, Zarkawtah entry form lak theih a ni a, October 1 thlengin theh luhna hun hawn a ni.

Muaythai Association of Mizoram hruaitute chuan Olympic Games-ah Muaythai lakluh a nih tawh avangin Mizote tan beiseina sang tak an nei a, Mahindra Pickup 4x4 LPS Pro Muaythai aṭangin hmasawnna a awm ngei dawn tih sawiin tel turin ṭhalaite an sawm nghal bawk.

Muaythai khelhna pangngai ring-ah ni loin mixed martial arts hmanga an inbeihna cage chhungah an innuai dawn a, Muaythai amatuer dan hnuaia inelna sang ber hmangin an inkhel ang. Mipui tana hmuhnawm tur ringawt ni loin muaythai hnuaia an kalpui mek amatuer leh professional tihhmasawn kawp an duh a, chumi mil tur chuan dan an siam a ni.

Weight hrang panga, kg 48 chin hnuai lam fly, kg 48 leh 54 inkar bantam, kg 54 aṭanga 63.5 inkar light, kg 63.5 aṭanga kg 71 inkar welter leh kg 75 chin chung lam super middle huangah title an inchuh dawn.

Weight tina champion hnenah Rs 3,00,000 zel pek an ni ang a, pahnihna Rs 1,50,000, semifinal-a tlaten Rs 7,500, quarterfinal-a tlaten Rs 3,000 zel an dawng dawn. Mahse, weight khatah tel 16 aia an tlem a nih chuan semifinal lut chin chauhin lawmman pawisa fai an la thei dawn a ni.