Roma chakna Dybala leh Abraham

Paulo Dybala-a'n goal a khung bakah Tammy Abraham tan a siamsak a, match hnuhnung bera an chetsual hnuah AS Roma an tho chhuak leh ta. Jose Mourinho naute hian an mikhualna ramah Empoli 2-1 in an hneh.

Roma hian Serie A match ruk aṭangin point 13 an hmu a, table-ah pangana an ni - an dinhmun a sang vak lo. Mahse, hmahruaitu Napoli nen an inthlauhna chu point khat lek a ni a, matct khet chet sual leh chet fuhah an dinhmun a inthlak nghal thei.

An tho chhuak
September thlatir khan Udinese mualah Roma hi 4-0 in an tlawm. Inkhelh banah Mourinho chuan, "Match li chhung 1-0 hlira chak loh ai chuan, vawi khat 4-0 a chak loh ka thlang zawk," a ti, a hnua Europa League an khelhah 2-1 in an tlawm zui bawk.

Portuguese manager hian sawisel a hlawh leh hman. Amaherawhchu, Thawhṭanni zan Serie A inkhelah erawh goal an khung hmasa a, mualneitu lamin chawlhlawk hmain Filippo Bandinelli hmangin sut mah se Ambraham-a'n chakna goal a khung.

Hun tawp dawnah Roma hian khung belh theihna remchang an nei a, mahse Lorenzo Pellegrini chuan penalty a hlah. Hun tawp dawnah Empoli midfielder Jean-Daniel Akpa Akpro hnawhchhuah a ni a, si phurh sut turin theihna an nei tawh lo.

Mou a lungawi
AS Roma coach Jose Mourinho chuan, "Tun aia nuamsa zawk khan hnehna chang thei tur chu kan ni, mahse a tawpa 2-1 a ni pawh hi lawmna tur a ni tho. Hun pek belh kha minute sarih zet kan khel a, thil dang a thleng chhunzawm lo hlauh.

"Empoli khan an khel chhe lo, coach Paolo Zanetti khan a naute a remkhawm ṭha hle a, point hmuh phu khawpin an bei. Mamawh hunah tak Dybala a rawn inlar, ani hi chu inkhela danglamna siam tur hi chuan kan beisei reng," tiin a sawi.

Empoli coach Paolo Zanetti chuan, "A chang hi chuan khel ṭha vak lo chunga point thum hmuh chang a awm, tun ṭumah erawh ṭha taka khel chungin point kan hmu lo," a ti, a team hi table mawngphah lamah an talbuai mek.