Halep a chawl rih dawn

World number 1 hlui Simona Halep chu a hnar zai a ni a, enkawl chhunzawm a ngaih avangin hun eng emawti chhung chu tennis a khel thei dawn rih lo - tun season tawp lamah erawh inlan leh hman tura beisei a ni.

Romanian star Halep chuan, "Hun rei deuh tak chu ka hnar hian min tibuai tawh, a chinfelna awmchhun chu zai hi a ni. Chawlh kar engemaw tichhung chu ka chawlh rih a ngai dawn, tennis court-ah kan inhmuh leh thuai ka beisei," tiin a sawi.

Grand Slam vawi hnih champion tawh Halep-i'n tournament a khelh hnuhnung ber chu US Open kha a ni a, a match hmasa berah Daria Snigur hneh loin a tla - world ranking chhuak thar berah pakuana dinhmun a la luah hram.