Haaland-a'n Dortmund a lo mikhual dawn

European football-a striker 'hot' ber pawl Erling Haaland-a'n Red Bull Salzburg aṭangin khawvel hmelhriat a hlawh ṭan a, a hming a chher tak takna erawh Borussia Dortmund a ni.

Manchester United leh Juventus ten an hel chungin, December 2019 khan Haaland hian Dortmund a zawm a, German club tan match 89-ah goal 86 ngawt a khung - Dortmund fan-ten an atchilh a, an ngaina takzet.

Mahse, tunah chuan Dortmund ralthuam ṭha ber ni ṭhin hi Manchester City striker a ni tawh a, zanin dar 12:30-ah Dortmund a lo mikhual dawn - Champions League-ah City leh Dortmund an intum dawn a, Haaland chu mipui mit fukna tur a ni.

A hming Haaland
Manchester City-in tun season Champions League-a an match hmasa berah 4-0 in Sevilla an sawp a, Haaland-a'n goal hnih a khung - Champions League match 20-a goal 25 a khungna chiah a ni a, a nep lo hle.

Norwegian striker hian, "Champions League hi ka ngaina a, ka tan chuan mang ram a ni. Ka phone ringtone-ah CL theme song ka hmang ṭhin a, zing tin ka ngaithla ṭhin," a ti a, European football-a club inelna sang ber a ngaihhlut thu a sawi.

Haaland hian Champions League nomawi chawi a duh a, chumi kawnga dal theitu chu a club hlui pawh ni se, a dim lo ang - zaninah Haaland-a goal khung hmuh inbeisei ila, kan tisual lo ber ang!

Mahse maw...
City-in tun season-ah goal khung an harsat lo - league match ruk aṭangin goal 20 an khung tawh a, CL match khat khelh tawhah goal li an khung bawk. Heng zinga goal 12 zet chu Haaland-a khung a ni!

Mahse, zaninah erawh Norwegian striker tan thil a danglam thei - Dortmund player-ten an ṭhian hlui hi an hrechiang a, ni tin an lo training pui ṭhin player hi dan theih a nih ngai chuan anni tluka a dan theih dan hrechiang tur an awm chuang lo.

Chutihrual chuan Dortmund tlarhnung a phui lo - tun season-a league match ruk an khelh tawhah vawi li chak mah se, goal riat an khung a, goal sarih an lamah a lut. City hian Haaland bakah Phil Foden, Riyad Mahrez leh Kevin De Bruyne te an nei a, Dortmund tan a harsa dawn.

A chhehvel
City player zingah hliam vangin Kyle Walker leh John Stones te inlan theih dawn leh dawn loh a la chiang lo a, Aymeric Laporte a inlan thei dawn lo chiang bawk - Dortmund defender hlui pahnih Manuel Akanji leh Sergio Gomez ten an club hlui an hmachhawn a rinawm.

Mahse, Dortmund an vanduai - City tlarhnung talbuai lai tak hmachhawn dawn mah se an tlarhma lam talbuai lai a ni! Match hmasa bera 3-0 a Copenhagen an hneh ṭuma lakchhuah ngai Thorgan Hazard dinhmun a chiang lo a, Donyell Malen (malpui) leh Karim Adeyemi (ke phah) dinhmun a sawi theih lo bawk!

Nipui transfer-a Sébastien Haller thlak nana hmanhmawh taka an lakluh Anthony Modeste rin a ngaih hmel a, City tlarhnung su hawng tura rin a harsa. Mahse, he team hian Marco Reus, Jude Bellingham leh Giovanni Reyna an la nei tih hriat a ṭha.