Champion thei kan ni - Ancelotti

Real Madrid boss Carlo Ancelotti chuan Champions League nomawi humhim tura an ṭhat tawk thu a sawi a, Champions League-a team a kaihhruai hmasak ber aṭanga a kum 25-na hmangtu King Carlo hian squad a nei ṭha tawkah a ngai.

AC Milan boss hlui chuan, "He team hi chuan a tawp thlengin kan bei mai ṭhin a, Champions League-a team ka enkawl hmasak ber aṭangin kum 25 a lo tling ta der tih pawh ka lo ngaihtuah lo.

"He inelnaah hian hlimna leh lawmna tam tak ka lo tawng tawh a, lungngaihna pawh ka tawng fo tawh. Mahse, ka hlawhtlin em avangin a tam zawk chu hlimna a ni a, tuna ka squad neih pawh hi champion tur khawpin an ṭha tawk a, chu chu kan tum bawk - eng nge thleng dawn, engmah a sawi lawk theih loh a ni," a ti.

Kum 63 mi Ancelotti hian Champions League-ah AC Milan leh Real Madrid chu vawi hnih ve ve a champion pui tawh a, nomawi pali neiin Champions League-a coach champion ngun ber record a chelh mek.

Real Madrid hian zanin dar 12:30-ah Champions League match khelh tur an nei a, RB Leipzig an mikhual dawn - match hmasa berah 3-0 in Celtic an hneh tawh bawk a, striker Karim Benzema inhliam mah se league-ah tlawm an la neih loh bawk avangin an 'puja' fuh lai tak a ni.

Ancelotti chuan, "Group paltlang ngai kan nih avangin match pawimawh tak a ni a, Leipzig hian season ṭantirah buaina nei mah se Dortmund nena an inkhelahte khan an khel ṭha hle. Tlarhmaah player quality leh tlan chak tak tak an nei a ni.

"Team hlauhawm tak an ni a, tlarhmaah leh hnung lamah kan khelh ṭhat ve ve a ṭul dawn. A ṭha thei ang bera khel a, hnehna chan kan tum dawn a ni," a ti.

Real hian Pathianni zan dar 12:30-ah Atletico Madrid nen La Liga-ah Madrid derby an khel zui dawn a, zaninah Santiago Bernabeu-a an inlan dawn bawk avangin Ancelotti-a'n a player ṭhenkhat a dah ṭha a nih pawhin a mak lo ang.