Police an vannei Electric Veng an vanduai nawn

Zote Honda MPL9-ah Mizoram Police-in nimin khan Electric Veng 2-1 in an hneh. Police goal khungtute hi an defender pahnih Lalrinzuala Khiangte leh Lalhmunmawia te an ni.

MPL9-a point hmu lo awm chhun Electric Vengin second half an thunun a, David Lalchhuanawma goal hmangin beiseina sang tak nei mah se si phurh sutna an khung thei lo. Electric Vengin match hmasa berah Chanmari FC an hneh tawh lo a, an khelh ṭhat phu tawk point an hmu lo.

Police hun
Mizoram Police-in sa huai an ser nghal a; Malsawmfela, Lalfakzuala, Lalbiakhlua (Hlutea) leh Lalnunsanga (Talea) ten bul an ṭan a, an goal bawh a na nghal.

Minute khat pawh an khelh tlin hmain Hlutea'n goal-ah ṭha zetin a pet a, keeper C. Vanlalhriata'n a nam over.

Electric Veng an insiam ṭha thei lo a, minute hnihna lekah corner kick aṭanga ball kal chu goal ban bula ding H. Zawnhmingthanga'n a hmaah lek a tauh thla a, Police defender Rinzuala'n kawh zetin a pet goal.

Police an phur zel a, set piece an hmang ṭangkai nawn. Minute 20-naah R. Malsawmtluanga freekick chu Ahmuntea'n a tlawh goal.

Electric Vengin mual vei lam aṭangin left back C. Zomuanpuia nawr bawk mah se goal hlauhawm an nei thei meuh lo a, midfielder H. Lalbiakthanga telna Police-in inkhel an thunun hle.

Electric Veng hun
Electric Vengin halftime an hmang ṭha a, second half-ah inkhelh dan hmang a dang hlak. First half-a goal hnih chhuahtu Electric Vengin goal khungna chance an ngah hle.

EFC captain David-a'n Police tlarhnung a rum ṭhaih a, minute 50-naah a phu ang ngeiin goal an khung. Electric Vengin passing game mawi an pho chhuak a, mual lai aṭangin Amos Lalnienga'n mual sira awm Malsawmhlua a pe. EFC wingback Mala cross chu Salem Veng tlangval David-a'n a tauh goal.

Electric Veng an phur a, Police goalkeeper F. Lalmuanawma khelh ṭhat ni an tawn avangin an vanduai. Man of the match-a thlan Muanawma hian Lalremsanga, Tetea, Zawma, Mawizuala leh David-a te goal khung tur a dang.

Police hi hun tawp lamah an talbuai a, tawnhriat nei ṭha leh tlan chak Lalsangbera leh Lalbiakhlua te a luhtir a, goal chance ṭum hnih an neih phah a, goal erawh an khung bik lo.

Police-in chak nem-nghehna an khung theih loh avangin a tawp thlengin an buai phah a, Electric Veng goal bawh a na tluan.

Jacob Lalrawngbawla enkawl EFC-in point hmu lo mah se an khel ṭha a, penalty beisei an hmu lo bawk nen an phu tawk ang point an hmu lo.

Coach thukhawchang
Mizoram Police coach Lalbiaksanga Colney chuan, "Bul kan kan ṭha a, a tawp lam erawh kan talbuai deuh. Player naupang enchhin nan kan hmang a, kan tisual teuh hle a ni," tiin a sawi.

Electric Veng manager Vanlalsawma Colney chuan, "Kan vanduai ṭhin hle. Referee thutlukna pawm thiam a har. Injury time minute thum chauh min pe kha a mak a, penalty min pe lo kha kan vanduai. Ka nauten theihtawp an chhuah a, ka chhuang hle," tiin Vanglaini a hrilh.