NBA an ṭan hnai - eng nge beisei tur la awm?

Basketball inelna ngaihven hlawh NBA chu July 31 aṭangin ESPN Wide World of Sports Complex, Orlando, Florida-ah khelh ṭan a ni dawn. Inelna atana inpuahchahna atan nizan aṭangin 'scrimmage game' khelh ṭan a ni.

2019-20 NBA season hi October 22, 2019 aṭang khan khelh ṭan a ni a, amaherawhchu Covid-19 vangin March 11, 2020 aṭangin khelh chhunzawm theih a ni ta lo. NBA-in inelna chhunzawm theih dan kawng an ngaihtuah a, inelna khelh hmabak chu hmun khatah vek khelh a ni tawh.

NBA-ah hian team 30 an awm a, Eastern leh Western Conference-ah ṭhendarh an ni a, inelna hi regular season leh playoff-ah ṭhenhran a ni. Playoff-ah hian conference pahniha che ṭha pariat ve ve an tling ṭhin. Tun ṭumah erawh dan pangngaiin regular season khelh zawh theih a ni ta lo a, inelna khelh hmabak chhunzawm turin team 22 thlanchhuah an ni a, hetah hian Eastern leh Western thliar bik a awm lo. Eastern lamin team kua an thawh a, Western lamin team 13 an thawh thung.

Team 22 hian match riat 

ṭheuh an khel leh dawn a, chuta ṭang chuan playoff khel tur chinfel a ni ang. Hemi a nih avang hian regular season-a team khelh zat a inang dawn lo a, a khel tam deuh Dallas Mavericks-in a hmaa an khelh tawh nen match 75 an khelh theih laiin San Antonio Spurs leh Los Angeles Lakers te chuan match 71 an khel dawn.

NBA Playoff kalphung a ngai dawn a, ṭum dang ang thoin team 16-in an khel dawn. August 17-ah first round khelh ṭan a ni ang a, August 31-ah semifinal khelh a ni ang a, Conference finals hi September 15 aṭanga khelh ṭan tur a ni ang. Champion zawnna NBA Finals chu September 30 aṭangin khelh ṭan tur a ni.

LeBron James-a telna LA Lakers chu kum sarih hnua a vawi khat nan Playoff khel turin an tling tawh a, kumin January khan club legend Kobe Bryant an chan bawk nen Lakers chanchinin ngaihven a hlawh ang.

Western aṭangin Lakers bakah Los Angeles Clippers, Denver Nuggets, Utah Jazz, Oklahoma City Thunder leh Houston Rockets te an tling tawh a, hmunruak pahnih a la awm. Eastern-ah pawh team paruk Milwaukee Bucks, Toronto Raptors, Boston Celtics, Miami Heat, Indiana Pacers leh Philadelphia 76ers te an tling tawh bawk.

Scrimmage game

Inelna atana inpuahchahna inkhel hi basketball-ah hian 'scrimmage game' tih a ni a, football-a 'friendly match' nen huang khatah a dah theih ang. Covid-19 in NBA a tihbuai hnua inelna ṭan a nih leh dawn avangin scrimmage game aṭangin ṭan a ni a, July 22-28, 2020 hian scrimmage game khelh tur a ni.

Team 22 chu

Eastern Conference

1. Milwaukee Bucks

2. Toronto Raptors

3. Boston Celtics

4. Miami Heat

5. Indiana Pacers

6. Philadelphia 76ers

7. Brooklyn Nets

8. Orlando Magic

9. Washington Wizards

Western Conference

1. Los Angeles Lakers

2. LA Clippers

3. Denver Nuggets

4. Utah Jazz

5. Oklahoma City Thunder

6. Houston Rockets

7. Dallas Mavericks

8. Memphis Grizzlies

9. Portland Trail Blazers

10. New Orleans Pelicans

11. Sacramento Kings

12. San Antonio Spurs

13. Phoenix Suns