Halep hnehin Sharapova a lo kir

Maria Sharapova-i'n thla 19 hnua a vawi khat nan Grand Slam a khel ve leh ta. Thawhṭanni zan khan Russian nula hian US Open first round-ah world number 2 Simona Halep hnehin tennis tournament zinga sum tamna berah bul a ṭan fuh hle.

Flushing Meadows, New York-a tennis stadium hming thang, mipui 23,771 ṭhut theihna Arthur Ashe Stadium-a mipui khat vek hmaah world number 1 hlui Sharapova hian darkar hnih leh minute 44 chhungin 6-4, 4-6, 6-3 in hnehna a chang.

Kum 30 mi Sharapova hi season hmasa Australian Open-ah damdawi hman phal loh a hmang tih hmuh chhuah a nih avangin thla 15 hrem a ni a, tunah hian world number 146 niin vawi khat a champion tawhna hmunah hian inlan tur­in wildcard pek a ni a, amah duh­saktute beiseina a tithlawn lo.

US Open draw neih a nih khan Sharapova leh Halep te inkhel nghal tur hian ngaihven a hlawh fal hle. Romanian nula Halep hi tunlai player ṭha a ni a, tun ṭumah hian thleng sang sela chuan world number 1 ni thei hial tur a ni, hei vang hian hmeichhe inkhel tur bikah chuan final ang maia hmuhnawm nghal tura ngaih pwh a ni reng a ni.

Tennis court chhungah tun hnaia a inlan tam loh avangin Sharapova hian tihsual a ngah, unforced vawi 64 ngawt a nei. Mahse, ball vaw na bik a nihna a lantir thei a, winners ṭum 60 zet vuain aces vawi sarih a nei bawk a, inkhel inhnehtawk takah hnehna changin Halep nen vawi sarih an intawn tawhah hnehna a chang fai vek.

Hnehna a chan hnuah Sha­rapova biangah mittui a luang a, a lawm thu lungchhe takin a sawi, "Point hnuhnung ber hmu ve tawh tan lo chuan he ka hlimna hi hriat thiam theih a ni lo ang. Hun harsa leh hrehawm tak paltlang rah chu tunah hian a rawn lang chhuak ta," tiin a sawi.

Wildcard
Grand Slam vawi nga champion tawh Sharapova hian April thla khan hremna a hmang zo a, hemi hnuah a malpui leh banrek na vangin a inkhel tam lo; French Open wildcard pek a ni lo bawk - May thla hnuah tun thla bikah match hnih a khelhna chiah a ni.

Athletic khawvelah Russia chu doping vangin a hming chhe mek a, Roland Garros lamin Sharapova hnena wildcard an pek loh pawh khan dem an hlawh lo a, expert tam zawk chuan inelna buatsaihtu lam an fak hial. Mahse, United States Tennis Association lam chuan ngaihdan dang an nei, an lalnu hlui hi duhsak leh duat takin an lo dawngsawng.

Arthur Ashe Stadium-a vawi 18 a inlan tawha chak fai vek Sharapova chuan, "Hlim hun a ni, ka tan chuan thil engkim hi a nuamin a thar vek mai a ni, min lawmpuitute leh min thlawp tlattute chungah lawmthu ka sawi," tiin a sawi.

Sharapova hian tun hnai thla 19 chhungin match 11 chiah a khel a, first round a khelh hma kha chuan a hriselna leh fitness a ṭha tawk a nge tih chu zawhna lian tak a ni. Court chhunga a luh chiah chuan inbuatsaihna a nei ṭha tih a takin a lantir a, amah ringhlel tute chu ball leh racquet hmangin a channa pe. Second round-ah zanin dar 8:30 hian world number 59 Timea Babos nen an intawng leh ang.

Barakhaih
Hmeichhe first round inkhel dangah seeded pasarihna Johanna Konta chu world number 78 Aleksandra Krunic lakah 4-6, 6-3, 6-4 in a chak lo nghal. Britain nula Konta hian kum 2015 leh 2016 khan US Open fourth round a thleng a, kuminah erawh chak ni hmel hmu miah loin a zinkawng a tawp.

Grand Slam vawi sarih champion tawh Venus Williams pawhin vawi hnih a champion tawhna hmunah hna hautak a hmachhawn ve nghal. Khawtual nula Venus hian world number 135 Viktoria Kuzmova 6-3, 3-6, 6-2 in a hneh. Kum 37 mi Venus hian US Open hi season 19 a khelhna chiah a ni a, tuna player khel lai zingah ani aia inlan hnem an awm lo.

World number 1 hlui Caroline Wozniacki chuan final vawi hnih a khelh tawhna hmunah bul a ṭan fuh hle, Danish player hian darkar khat leh minute 20 chhung lekin Mihaela Buzarnescu chu 6-1, 7-5 in a hneh. Kum 27 mi Wozniacki hian kuminah final vawi ruk a khel tawh a, mahse nomawi a la chawi lo! Tun hma lama a tluk loh ṭhin Serena Williams a inlan loh avangin US Open-ah hian beiseina a nei sang hle ang.

Inkhel dangah Wimbledon champion Garbine Muguruza erawhin awlsam takain Varvara Lepchenko chu 6-0, 6-3 in a hneh a, Petra Kvitova pawhin kum 2008 finalist Jelena Jankovic chu 7-5, 7-5 in a hneh ve bawk.